Cafran de kar û xebata axpînan newe newe dest pêkenê. Seba ramitişê bezreyan şar pabeyê germbîyayîşê hewayî bi. Dewijan senî ke hewa bi germ dest pê kar kerd.
Her cayê Cafranî de dewijî pê tuwerzîn, kulbe, huye yan zî destanê xo erdî reyde bilîyaye yê. Dewa Cafranî ya Çewlîgî de hema zî dewijî pê hengazîyan erd kenenê.
Dewijanê Cafranî ra Ap Mehmed vano: ”Ez emser kartol, lobî, kuyan, maydanoz, îsot, firing, pîyaz, sîr ramena. La heşî çîyêk nêverdenê. Tîya de zaf heşî estê. Yenê kewenê axpînan. Ma pê nêeşkenê.”
Dewijan ra Serkan zî heman çîyan rameno. Serkan vano: ”Ez seba barê heşan tay zêdêr ramena.”
Dewijî ge ge molaya çayî danê. Cafran de têna 3 domanî estê. Ê bînî pîl ê.
Dewijan ra Hindanî Kîşîn senî ke awe helîyena cade yena dewe. Dayîka Xemsîye ya 80 serre zî hema zî dest erzena karanê axpînî. Vana: ”Mi emser cayê kartol, lobi û pîyaz vurnayî. Eke ti her serre heman cayî de birame bibereket nêbenê. Erd bibereket o, ma çita biramê, dano.
Serkan wayîrê 3 domanan o û ewnîyeno heywanan zî. Serkan rewşa xo wina ano ziwan: ”Ez dewe ra hes kena. Asan nîyo ke merdim karê şarî de bixebito. Ma tîya de pê keda xo debarê xo kenê. ”
Ma derbazê bostanê bînî benê. Uca de zî Nazîme ha xebitîyena. Nazîme pê zorî qedexeyê vejîyayîşê teberî ra xelisîya û Stenbolî ra ameya dewa xo. Nazîme vana: ”Ma seba domananê xo, merdimanê xo zî erdê xo ramenê.”
Dewa Cafranî de bostanê Zekîne û Mustafa namdar o. Wurdêmînî zî bostanê xo de bilîyê karê xo benê. Zekîne zî hem seba domananê xo hem zî seba merdimanê xo erdê xo ramena.
Dewijî vanê hema seba ramitişê firing, îsot û swn rew o. Nika dewa Cafranî de rojdem vîrusê Korona yo. Dewijî mabênê yewbînan de xoşebere kenê ke kamî ameyê, kamî nêeşkîyayê bêrê.
Rinde û mêrdeyê xo zî firsendêk dîyo û Stenbolî ra ameyê dewa xo. Rinde wexto ke wesayîtê ra yena war, lew nana erdî ro û nîyaz kena. ÇEWLÎG
