Dewa Saldaxî ya ke payîzî de pêro rindekîya rengan ê xoza xo de dana teber, bîya mekanê xozahes û fotografkaran
Bi ameyîşê payîzî rişîyayîşê pelan dest pêkerd. Dewa Saldaxî yê Pilemurîya Dêrsimî bîyê cayê veyveyê rengan. Saldaxo ke bîyo reng bi reng de koyan ser o ke vewre vareye dîmenê efsunî vejîyayî meydan. Saldax rindekîya pêro rengan pêşkêşê zîyaretkerdoxan keno û naye ra peynîya teşrîna verêne ra heta mîyanê aşma teşrîna peyêne beno mekanê zîyaretkerdoxan.img
Zaf cayanê Tirkîya ra zîyaretkerdoxî ênê veyveyê rengan ê Saldaxî. Nê zîyaretkerdoxî hem hewayê pakî yê Saldaxî de gêrenê hem zî xoza temaşe kenê. Xozahesî seranserê roje keyfê rindekîya xozayî kenê û vanê ke xozaya tîyayî huzur dana înan.
Yew rindekîya bêensale
Perîhane Soylemeza ke înanê ke gêrayîşê xozayî serûber kerdo ra yew a vat ke yew hefteyî de reya dîyin a ke Saldaxî de gêrayîşê xozayî serûber kenê û rindekîya xozaya tîyayî bêemsal a. Soylemeze îfade kerd ke dewa Saldaxî de zaf rengî têleye de yê; zerd, sûr û kesk bîyo veyveyê rengan û dîmenê zaf weşî vetê meydan.
Xoza huzur dana
Soylemeze vat ke ko û deştê Dêrsimî zaf rindek ê, bi taybetî Saldax wayîrê yew rindekîya taybetî yo. Xozaya Dêrsimî huzur dana merdimî, merdiman kena asan, strejê merkezanê şaristanan gêna. Ma seranserê roje xoza ra gêrenîme û bi nê hawayî keyfê xoza kenîme. Ganî her kes bêro na rindekîye bivîno.
Têleye ameyîşê hîrê mewsîman
Wendekar Boran Demîr û Yilmaz Dogukan Pala yo ke merkezê Dêrsimî ra reya verêne tewrê gêrayîşê Saldaxî bîyê vat ke tîya de mewsîmê wisar, hamnan û payîzî ameyê têleye, tîya yew cayo zaf rindek o. Wendekaran dîyar kerd ke Saldax cayanê tewr rindekan ê Dêrsimî ra yew o, bi veyveyê rengan yew manzaraya zaf muhteşeme vejîya warye. DÊRSIM
