Vîrusê Korona ke ewilî bajarê Wuhanî yê Çînî de vejîyabî raşte tesîrê xo zêdîneno. Dewê Endewl û Heramîyê yê pabesteyê qezaya Dêrikî ya Mêrdînî 8ê nîsane de girîyabî binê karantîna. Leşkerê ke dekewtiş û vejîyayîşê dewan de nuqtayê ciewnayîşî awan kerdbî, destûr nêdanî ke kesêk şêro dewan û dewan ra vejîyo. Dewan de heta nika 15 kesan de janê Vîrusê Korona (Covid-19) ame tespîtkerdene û coka dewî girîyayî binê karantîna. Dewê Mêrdînî de yewna hewte demê karantînaye ame dergkerdene.
Dew û mezrayanê ke nufûsê ci 3 hezar û 200 kesî yî, badê vilabîyayîşê janî 200 karkerî Stenbol ra agêrabî dewan. Pîyê 2 domanan Nurettin Çinarî bi janê Vîrusê Korona ra cuya xo vindî kerdbî û hedîse ra dima dew girîya binê karantîna.
Heta nika dewa Tibyad ya Qoserî, dewa Qesra Ehmed, dewa Qurdîs û dewa Bernîşt ya Artuklu, dewê Endewl û Heramîyê yê Dêrikî, dewa Deramatine ya Şemrexî û dewa Barman ya Stewrê karantînaye de yî. MÊRDÎN
