Hevserokê KONGRA-GEL Remzî Kartal di civîna ji bo piştgiriya bi HDP’ê re de axivî. Kartal da zanîn ku dewleta tirk li ber têkçûnê ye û da zanîn ku divê gelê kurd berxwedana xwe mezintir bike
Bi armanca piştgiriya di hilbijartina rêveberiyên herêmî yên di 31’ê adarê de ya bi Partiya Demokratîk a Gelan (HDP) re, li Evryê civînek hat lidarxistin. Di civînê de hevserokê KONGRA-GEL Remzî Kartal, parlamenterê berê yê HDP’ê Mehmet Emîn Adiyaman û siyasetmedarê kurd Firat Eleşkîrt jî amade bûn.
Di destpêka civînê de siyasetmedarê kurd Firat Eleşkîrt axivî û diyar kir ku ger li bajarên wekî Qers, Agirî, Mûş û Erziromê pêş bikevin, ew dikarin bi ser bikevin. Hevserokê KONGRA-GEL Remzî Kartal axivî û da zanîn ku dewleta tirk li ber têkçûnê ye û gelê kurd bi berxwedanê dikare biserkeve.
‘Di destê dewleta tirk de tenê tirs maye’
Remzî Kartal anî ziman ku li pêşiya wan hilbijartinek heye û ev nirxandin kir: “Ev bi tenê ne hilbijartin e, di heman demê de şer e jî. Mesele ne ya AKP û MHP’ê ye. Meseleya wan ew e ku têkevin pêşiya siyaseta gelê kurd. Gelê kurd jî hay ji vê yekê heye. Rêbertî li ber xwe dide, Efrîn li ber xwe dide û gerîla li ber xwe dide. Tirkiye ber bi hilweşandinê ve diçe. Deynê Tirkiyeyê yê îsal 337 milyar dolar e. Dewlet hemû budçeya xwe bide ser hev jî nikare faîza wê bide. Dewleta tirk ji sedî 24 pereyan bi faîzê distîne û bi ji sedî 13 jî jî dide gel. Heta hilbijartinê wisa wê bikin. Divê her kes bizanibe ku Tirkiye êdî nikare bi vê budçeyê şer bidomîne. Di vê hilbijartinê de, hedefa me ew e ku em wan hilweşînin. Tenê tirs di destê wan de maye.”
Kartal di dawiya axaftina xwe de jî banga xwedîderketina li grevên birçîbûnê kir. PARÎS
