Leşkerên artêşa dewleta tirk li Colemêrgê bi helîkopterê gule li ser gundiyên bazirganî dikirin reşandin. Di gulebarînê de zarokê 14 salî Vedat Ekîncî hat qetilkirin
Dewleta tirk bi komkujî û kuştinên sivîlan xwedî gelek kiryarin. Yek ji rêbazê kuştin û komkujiyan jî bi balafirên şer pêk tîne. Beriya bi 8 salan dewleta tirk li Roboskê bi balafirên şer komkujî pêk anî û 34 sivîl ku piraniya wan zarok bûn qetilkir. Dewletê xwest heman komkujiyê dubare bike û vê carî jî li Colemêrgê bi helîkopteran gule li kuran reşandin.
Leşkerên artêşa dewleta tirk bi helîkopterê li Gundê Çemê Kurk ê bajaroka Rûbarokê ya Colemêrgê, li ser gundiyên ku li ser sînor bazirganî dikirin gule reşandin. Gundiyên bazirganiya sînor dikirin dema ji Herêma Federel a Kurdistanê vedigeriyan, leşkrên artêşa tirk bi helikopterê gule li ser welatiyan reşandin. Di gule baranê de zarokê 14 salî Vedat Ekîncî hat qetilkirin. Di gulebaranê de welatiyekî di nava komê de jî birîndar bû. Li gorî çavkaniyên herêmî saet li dora 15.00’ê esir de bûyer pêk hat. Welatiyên agahî stendin bi hawariyê ve çûn û çûn ser sînor. Welatiyên gihiştin ser sînor dîtin ku Vedat Ekincî jiyana xwe ji dest daye. Piştî bûyerê leşker hatin cihê bûyerê û bertek nîşanî xizmên Vedat Ekîncî dan. Cenazeyê Ekîncî piştre ji bo otopsiyê rakirin Nexweşxaneya Dewletê ya Colemêrgê. Gundiyê birîndar bû jî li nexweşxaneyê tê dermankirin. COLEMÊRG
