Dewleta tirk li gundê Basûfanê yê êzidiyan ji bo avakirina baregeheke leşkerî, zêdetirî hezar darên zeytûnê birîn. Welatiyên êzidî yên li kampa Serdemê ya Şehbayê jî ev kiryar şermezar kir
Hêzên artêşa tirk ku tevî çeteyên xwe Efrîn dagir kir, hewl dide ku xwe li Efrînê mayînde bike. Bi vê boneyê jî li dora Efrînê dîwarek ava kir û niha jî dixwaze ku li her deverekê Efrînê baregehên leşkerî ava bike. Di dema avakirina van baregehan de jî artêşa tirk xwezaya Efrînê talan dike.
Êzidiyên Efrînê yên li Şehbayê, li dijî kiryarên dewleta tirk û çeteyên wê yên li ser gundên wan, li kampa Serdemê ya Şehbayê daxuyaniyek dan. Di daxuyaniyê de welatiyên êzidî destnîşan kirin ku dewleta tirk û çeteyên wê li Efrînê talan û wêraniyeke mezin pêk tîne û ev kiryarên hêzên dagirkeran şermezar kirin.
Di daxuyaniya êzidiyan de hat destnîşankirin ku dewleta tirk ji bo avakirina baregeheke leşkerî ya li gundê Basûfanê ku gundekî êzidiyane, zêdetirî hezar darên zeytûnê birîne. Di daxuyaniyê de hat gotin ku dewleta tirk bi van kiryaran dixwaze xwe li Efrînê mayînde bike û daxuyanî wiha bi dawî bû: “Em bêdengiya cîhanê ya li hemberî vê hovîtiyê jî şermezar dikin. Em bang li rejîma Sûriyeyê jî dikin ku bi erka xwe rabe û Efrînê ji kiryarên dewleta tirk xelas bike.” ŞEHBA
