Nivîskar, rojnamevan û siyasetmedar Cemîl Reşîd têkildarî dagirkeriya dewleta tirk û çeteyên wê ya li herêmên girêdayî Bakur û Rojhilatê Sûriyeyê ji ANHA’yê bi Solîn Reşîd re axivî.
Cemîl Reşîd diyar kir ku dewleta tirk û çeteyên wê hewl didin gelên li herêmên dagirkirî asîmîle bikin û wiha got: “Li cem dewleta tirk plansaziya vê pêvajoya pişaftinê heye. Ev demeke hewl didin pêk bînin. Ji herêmên weke Ezaz, Cerablus û Babê destpêkirin û niha jî li Idlibê xistin meriyetê.”
Leşkerên zarok
Reşîd her wiha qala leşkerkirina zarokan kir û got ku dewleta tirk hemû pîvan, peymanên navdewletî binpê dike. Reşîd da zanîn ku divê dewleta tirk bê cezakirin û wiha domand: “Dewleta tirk şêniyên herêmê di şerê xwe yê li deverên din ên cîhanê de bi kar tîne. Heke em zarokekî kurd ê efrînî yan jî yekê ereb di nava artêşa Somaliyê de bibînin qet şaş nabin.”
Bi domdarî jî Reşîd ev tişt anî ziman: “Di kûrahiya stratejiya dewleta tirk de fikrên îxwanî hene. Yek ji berpirsyarên van sûcên dewleta tirk jî hemû rêxistinên navdewletî ne. Banga ji bo van rêxistinan ew e ku raporên xwe pêşkeşî Konseya Ewlehiyê û NY’ê bike. Her wiha divê dewleta tirk hişyar bikin ku dawî li van sûcên şer bînin.”
Bang kir
Herî dawî jî Reşîd wiha axivî: “Banga min ji bo hêzên niştimanî yên Sûriyeyê jî ew e ku li dijî binpêkirinên dewleta tirk ên weke revandina zarok û jinan bisekinin. Dewletên garantor ên weke DYA û Rûsya berpirsyarên van binpêkirinan in. Tevî bangên Rêveberiya Xweser jî ev hêz bêdeng in. Divê hikûmeta Sûriyeyê bi rêya Konseya Ewlehiyê hevalbendên xwe yên weke Rûsya û Îranê bixe nava liv û tevgerê.” HELEB
