Artêşa tirk û çeteyên wê malbatên çeteyan li malên kurdên li bajarê Girê Spî bi cih dikin
Piştî dagirkirina dewlet tirk û çeteyên wê yên bajarê Girê Spiyê, dewleta tirk li bajêr dest bi guhertina demokrafiya bajêr kir û her wiha çeteyên wê jî mal û milkên gel talan dikin.
Di çarçeveya vê guhertina demografiyê û talankirinê çavkaniyên herêmî ji hundirê bajarê Girê Spiyê ji ajansa ANHA’yê re ragihandin ku artêşa tirk û çeteyên wê El-Nusra û DAIŞ malbatên çeteyan li malên kurdan ên hundirê bajêr bi cih dikin û mal û milkên wan desteser dikin.
Di heman demê de çavkaniyan diyar kirin ku hin kolan niştecihên wê bi temamî kurd in û çete û malbatên xwe ketine wan malan, di gel ku têketin û derketinên bajêr girtine, tenê têketinek hiştine û çeteyan da ku şênî negihêjin malên xwe bendên kontrolê danîne.
Çavkaniyan dan zanîn ku li bajêr xof û tirsek mezin heye, di heman demê şênî ditirsin ku çete mal û milkên wan desteser bikin û wan ji malên wan derxînin û destnîşan kirin ku li hundirê bajêr rewşên dizî û wêrankirina mal û milkan zêde ne. GIRÊ SPÎ
