Bi dagirkirina herêmên Cerablus, Bab, Ezaz, Idlib, Efrîn, Serêkaniyê û Girê Spî re, dewleta tirk û çeteyên wê êrîşên xwe yên li dijî jinan zêdetir kirin. Li van herêmên dagirkirî hê jî gelek jin tên revandin, tecawizkirin, qetil kirin û îşkencekirin. Hêzên dagirker li ser jinan sepanên DAIŞ’ê dimeşînin.
Jinên ku ji van herêmên dagirkerî koçber bûn û nûnerên rêxistinên mafên mirovan û saziyên jinan, ji ANHA’yê bi Silava Abdulrehman û Yara Mihemed re axivîn. Hevseroka Rêxistina Mafên Mirovan a Herêma Cizîrê Evîn Cûma da zanîn ku ji roja dagirkirina Efrînê heta niha hewl didin binpêkirinên li dijî jinan belge bikin û ev agahî dan: “Li Kantona Efrînê bi qasî ku haya mê jê bûye, 40 rewşên cuda, 128 rewşên birîndariyê, 60 sûcên destdirêjiyê, 5 întîxar û hezar kiryarên revandinê çêbûne.”
Cûma da zanîn ku li Serêkaniyê û Girê Spî jî ji meha cotmehê heta niha 8 jin hatin qetilkirin, 48 jin birîndar bûn, 2 jin hatine qetilkirin, agahî ji 4 jinan nayê girtin û 6 jin jî hatine revandin û rastî destdirêjiyê hatine.
‘Jinan direvînin û dikin cariye’
Têkildarî mijarê ji koçberên Serêkaniyê Cîhan Ehmed jî wiha dibêje: “Artêşa tirk çawa derbasî Serêkaniyê û gundên wê bû, dest bi binpêkirinan kir. Avahî hilweşandin, gor xerab kirin, mal û milk talan kirin, tecawiz li jinan kir û sivîl revandin. Kiryarên wê ne kêmî yên DAIŞ’ê ne. Jinan direvînin, fîdyeyê ferz dikin, jin dikirin cariye û înfaz dikirin.”
‘Rêbazên dewleta tirk û DAIŞ’ê heman in’
Endama Koodînsyona Kongreya Star a Rojava Daliya Henan jî destnîşan kir ku binpêkirinên artêşa tirk ên li herêmên dagirkirî û yên DAIŞ’ê heman in. Henan got ku bi belge îspat kirine ku jin rastî tundiyê tên, tên revandin, destdirêjî lê tê kirin û tên îşkencekirin. Henan da zanîn ku jinên li herêmên dagirkirî ji bo pêşeroja xwe bifikarin û dom kir: “Banag me ji bo rêxistinên mafên jinan û rêxistinên mafên mirovan ew e ku zextê li civaka navneteweyî bikin da ku rê li pêşiya kiryarên dewleta tirk û çeteyên wê bigirin.”
Der barê mijarê de endama rêveberiya Rêxistina Sara ya Têkoşîna li dijî Jinan Necah Emîn jî wiha got: “Piştî şewba koronayê peywendiyên me yên bi rêxistinên jinan ên Ewropayê re qut bûn. Niha bar tenê li ser milê rêxistinên herêmî ye. Em ê ji bo parastina mafên jinan bi hemû derfetên xwe têbikoşin.” QAMIŞLO
