Meclisa Rêveber a Rêveberiya Xweser a Herêma Cizîrê bi daxuyaniyekê ragihand ku dewleta tirk qadên sivîlan hedef digire û ji ber vê yekê jî bi dehan sivîl hatine kuştin û birîndarkirin. Meclisa rêveber da zanîn ku dewleta tirk bi êrîşên xwe zagonên navdewletî binpê dike
Meclisa Rêveber a Rêveberiya Xweser a Herêma Cizîrê têkildarî êrîşên dagirkeriyê yên dewleta tirk ên li dijî rojavayê Kurdistanê daxuyaniyek bi raya giştî re parve kir.
Daxuyaniya Meclisa Rêveber a Rêveberiya Xweser a Herêma Cizîrê wiha ye:
“Dewleta tirk bi hemû çekên giran û beşdarbûna bi hezaran çeteyan di 9’ê cotmeha 2019’an de li ser sînorê ji Dêrikê heta Kobanê dest bi êrîşan kir. Balafirên dijmin û çekên wê ji seatên destpêkê ve bajar û gundên ku sivîl lê hene hedef girtin û di encama van êrîşan de jî bi dehan qûrbanî û birîndarên sivîl çêbûn.
Her wiha dijmin di bombebarana xwe de saziyên sivîl, navendên ol ên pîroz, noqteyên tenduristiyê û avahiyên jiyanê hedef girtin. Li Serêkaniyê stasyona ava vexwarinê ku ji wê av diçe herêma Hesekê jî hedef girt û ji xizmetê derxist. Dewlet tirk tîmên destpêkê yên ku dixwestin destwerdana stasyonê bikin jî bombebaran kirin. Di demeke ku bajarê Hesekê û gundên wê pêşwaziya hezaran şêniyên Serêkaniyê û gundewarên wê ku ji ber êrîşa Tirkiyeyê koçber bûn de ev yek hat kirin. Ev yek jî ji ber ne peydakirina avê, alozî û êşa rast çêdike.
Kampên mirovî jî ji êrîşên wan rizgar nebûn. Di vê çarçoveyê de Kampa Mebrûkayê ku zêdetirî 7 hezar koçberên ji hemû herêman le diman jî ji van êrîşan xelas nebûn. Bi zêdebûna êrîşên Tirkiyeyê û hedefgirtina wan a herêmên sivîlan re, em teqez dikin ku herêm rastî keraseta mirovî tê ku dewleta tirk bi vê yekê hemû zagon û belgeyên navneteweyî binpê dike.
Em weke Meclisa Rêveber a Herêma Cizîrê, bang li civaka navneteweyî û hemû rêxistinên navneteweyî û mirovî dikin ku zextê li dewleta tirk bikin da ku dawî li vê dijminatiya xwe bînin.”
