Hat diyar kirin ku 36 endamên Meclisa Ciwanên HDP’ê yên hatin binçavkirin, paşve hatine kelepçe kirin û rastî îşkencê hatine
Di çarçoveya lêpirsîna de ku navenda wê Stenbol e, di 8’ê mijdarê de li dijî endamên Meclisa Ciwanan a Partiya Demokratîk a Gelan (HDP) operasyona binçavkirinê hatibû dest pêkirin û yek jê zarok 36 kes hatibûn binçavkirin. Dema binçavkirina 36 kesên ku duh birin edliyeyê, 4 rojên din jî hat dirêjkirin.
Hat diyar kirin ku yek ji ciwanên di bin çavan de Metîn Yilmaz ê piştî birin edliyeyê û paşve anîn Miduriyeta Polîsan, ji ber ku pêkanîna lêgerîna tazî qebûl nekiriye, wî xistine odeyek bêkamera û bi awayekê ku li ser bedena wî şop nemînin, hatiye îşkencekirin. Hat ragihandin ku Yilmaz niha bi zorê dimeşe û ligel vê yekê jî, li ser benda wî tu şopên îşkenceyê xuya nakin.
Nexweşxane raporê neda!
Parêzeran dest nîşan kirin ku ciwan ji bo rapora tenduristiyê bigirin birine nexweşxanê û ji ber ku kelepçeyên destê wan hişk girê dane, zendê wan reş bûne û ciwanên xwestine li ser vê yekê raporê bigirin, bijîşkan ew ji odeyê derxistine.
Parêzeran da zanîn ku bijîşkan ciwan muayene nekirin, rapor nedan wan û ligel hemû hişyariyên kirine jî muwekîlên wan bi paşve kelepçe kirine.
Her wiha hat îdiakirina ku kesên ji bo sohbetê bangî ciwanan kirin û ji wan re gotin ‘Rayedarên dewletê ne’ ciwan bi girtinê tehdît kirin e. STENBOL
