Reyhan Coşmûşlû ya ji 17’ê kanûnê ve li Girtîgeha Bakirkoy di grev birçîbûnê de ye bi rêya malbata xwe ev bang li raya giştî kir û wiha got: “Di kolên Tirkiye û Kuristanê de bibin dengên me.”
Yek ji girtiyên li dijî tecrîdkirina Rêberê Gelê Kurd Abdullah Ocalan di grevên birçîbûnê de ye Reyhan Coşmûşlû ya li Girtîgeha Jinan a Bakirkoyê dimîne ye. Coşmûşlû, di sala 2016’an de bi îdîaya “Endamtiya rêxistinê” hat girtin, 10 sal û 6 meh cezayê girtîgehê lê hat birîn. Coşmûşlû dest pê kê li Girtîgeha Tîpa E ya Amedê, piştre li Girtî Tîpa T a Xarpêtê û niha jî li Girtîgeha Sergirtî ya Jinan a Bakirkoyê dimîne.
Coşmûşlû, di hevdîtina bi telefonê ya li gel malbata xwe, derbarê çalakiya xwe de ev peyam da: “Bi hêviyên serkeftinê em hemû gelê kurd silav dikin. Di berxwedana zindanan a dîrokî de cih girtin, hestek pîroz e. Ev çalakî roj bi roj mezin bû û belav bû. Îro bi hezaran kes bi kelecaniyek mezin beşdarî vê pêvajoyê bûn. Em başin, daxwaz û rojeva me zelalin. Bi bîr û baweriyek mezin, me dest bi vê çalakiyê kir. Em bi rihê 14’ê Tîrmehê weke şopdarên Kemal Pîr û Hayrî Dûrmûş heta dawiya çalakiya xwe berdewam bikin. Teqez armanca me ne mirine, berovajî em dixwazin xwe bigihînin heqîqek û jiyana azad. Ev hiqîqet jî bi Rêberê Gelê Kurd Abdullah Ocalan ve girêdayî ye.”
‘Xwedî li berxwedan û zarokên xwe derkevin’
Coşmûşlû da zanîn ku heta tecrîd bi dawî nebe, dê çalakiya xwe bi dawî nekin û ev bang li raya giştî kir: “Heta ku Ocalan di bin tecrîdê de be, dê çalakiya me berdewam bike. Bi taybetî dixwazim bang li gelê me bikin; xwedî berxwedana zarokên xwe derkevin. Bila di kolanên Tirkiye û Kuristanê de bibin dengê me.” STENBOL
