HDP’a Êlihê bi beşderiya gelek endam, rêveber, nûnerên partî û saziyan 2’yemîn kongreya xwe pêk anî. Di kongreyê de, banga yekitiyê hat kirin
Partiya Demokratîk a Gelan (HDP) ya navçeya Navendî ya Êlihê, 2’yemîn Kongreya xwe ya Asayî li Salona Dawetê ya Gala li dar xist. Nûnerên Partiya Demokratîk a Kurdistan a Tirkiyeyê (TKDP, Partiya-Bakur a Demokratîk a Kurdistanê (KDP-Bakur), Partîya Azadî û gelek nûnerên civaka sivîl beşdarî kongrê bûn.
Piştî deqeyek rêzgirtinê, ji bo dîwana kongrê hilbijartin hat kirin. Parlementerê HDP’ê yê Êlihê Necdet Îpekyuz, di kongreyê de axivî û wiha got: “Em Hevserokên HDP’ê yên Bajêr Nîzamettîn Tugûç û Hevserokê DBP’ê yê Êlihê Şukru Topkan ên hatin girtin silav dikin. Di HDP’ê de siyaset kirin zore lê tune kirina HDP’ê jî pir zore. HDP partiya gelane û gel piştgiriyê dide HDP’ê.”
Ûca: Li dijî yekitiya kurdan dijminatiyê dikin
Parlamenter Feleknas Ûca jî bal kişand ser dijminantiya kurdan û wiha axivî: “Divê li dijî dijminantiya kurdan yekitî bê avakirin. Rêberê Gelê Kurd ev 20 salin girtiye û dibin tecrîdê deye. Kêm jî be ev tecrîd hatiye şikandin. Em ê bi rihê yekitiyê têkoşîna xwe ya azadiyê berdewam bikin.”
Banga yekitiyê
Parlamenterê HDP’ê Mûsa Farîsogûllarî jî bal kişand ser girîngiya tevlîbûna kongreyê û wiha ev bang kir: “Li dijî komkujiyên li ser kurdan û polîtîkayên tunekirinê, yekitî û bi hevre bûn pir girînge. Em dinava yekitiyê de piştevaniya xwe mezin bikin.”
Piştî axaftinên hatin kirin, raporên malî û xebatên partiyê hatin xwendin. Dûre hilbijartina hat kirin. Di hilbijartina hat kirin de, ji bo Hevserokatiya HDP’ê ya Navçeya Navendî ya Êlihê Azad Esîn û Gûrbet Dogan hatin hilbijartin. ÊLIH
