Komeleya Nûçegihanan a Dîcle Firatê (DFG) rapora meha adarê ya binpêkirina mafan a der barê nûçegihanan de aşkera kir.
Di raporê de hate gotin ji dawiya meha sibatê û ji destpêka adarê ve gelek nûçegihan hatine binçavkirin û girtin. Bi domdarî hat destnîşankirin ku der barê nûçegihanên ku têkildarî endamê MÎT’ê yên ku li Lîbyayê mirîn nûçe çêikrin de lêpirsîn hatiye destpêkirin û xebatkarên Oda TV, rojnameya Yenî Yaşamê û Yenîçagê di vê çarçoveyê de hatine binçavkirin.
DFG’ê bal kişand ser qanûna înfazê û xwest ku hemû girtiyên siyasî û nûçegihan bên berdan. Di raporê de DFG’ê aşkera kir di serdema vîrûsa koronayê de zext û zordarî, destgîrkirin, lêpirsîna li ser nûçegihanan didome, gelek nûçegihan û bikarhênerên medyaya sosyal ji bo ku di parvekirinên xwe de gotine li dijî vîrûsa koronayê zêde tevdîr nayên girtin, hatine binçavkirin.
Bîlançoya meha adarê
Daxuyanî wiha bi dawî bû: “Li Tirkiye û bakurê Kurdistanê 103 nûçegihan girtî ne. Di adarê de 15 nûçegihan hatin binçavkirin, 8 jê hatin girtin, der barê 12 nûçegihanan de lêpirsîn hatine vekirin, der barê nûçegihanekî doza hatiye vekirn, ceza li 5 caran hatiye birîn, doza 18 nûçegihanan didome, malperek hatiye astengkirin û 1 nûçegihan jî ji kar hatiye avêtin.” AMED
