Gelên rojavayê Kurdistanê bi xebatên cur be cur tên cem hev û çanda xwe didomînin. Ji van xebatan yek jê Mihrîcana Çanda Neteweya Demokratîk a bi dirûşma “Bi rihê neteweya demokratîk em ê Bakur û Rojhilatê Sûriyeyê biparêzin û azadiya fîzîkî ya Rêber Abdullah Ocalan misoger bikin” 2 rojan li navçeya Til Birakê ya kantona Hesekê pêk hat bû.
Têkilkdarî mihrîcanê û girîngiya wê, endamnê komîteya amadekar Keder Hisên axivî. Keder Hisên got ku mihrîcan peyama; “proje û çanda neteweya demokratîk li Bakur û Rojhilatê Sûriyeyê hatiye rûniştandin” da cîhanê
Hevseroka Meclisa Civakî ya Ermenî ya Kantona Hesekê Mîgirîk Mîxaîliyan jî anî ziman ku di navbera pêkhateyên herêmê de gelek tişt wekî cil û berg, ziman, adet û rihê neteweyê dişibin hev û got ku ev hemû di mihrîcanê de diyar bûn.
Cîgira hevserokatiya Komîteya Çand û Hunerê ya Kantona Qamişloyê Marya Eho jî diyar kir ku beşdarbûna tevahî pêkhateyên bi cil û bergên xwe yên neteweyî hevgirtina wan nîşan dide û wiha domand: “Pêkhateyan di mihrîcanê de çand, ziman, kevneşopiya xwe bi hev dan nasandin.”
Marya Eho destnîşan kir ku Mihrîcana Neteweya Demokratîk peyama “gelên herêmê hevgirtî ne” da û wiha domand: “Me ji bo êrişkaran û tevahî kesên ku dixwazin nasnameya me biçewisînin û erdnîgariya herêmên me biguherin, da xuyakirin ku gelên herêmê hevgirtî ne û ruxmî ku çand, huner û adetên me ji hev cuda ne jî, lê em xwişk û bira ne.”
Hunermend Teleb El Nazir ê ji pêkhateyê Ereb hestên xwe bi van gotinan anî ziman: “Mihrîcana Çanda Neteweya Demokratîk tevahî pêkhateyên Bakur û Rojhilatê Sûriyeyê anîn gel hev û mîrateya wan di bin sîwanekê de kom kir.”
Teleb El Nazir diyar kir ku mihrîcanê îsbat kir ku pêkhateyan Bakur û Rojhilatê Sûriyeyê hîna bi mîras û çanda xwe ya madî û manewî ve girêdayî ne.
