Navenda Nûçeyan
Navenda Belgekirina Mafên Mirovan a Bakur û Rojhilatê Sûriyeyê, rapora xwe ya li ser binpêkirina mafên mirovan ku di navbera 1-10’ê çileyê de ji aliyê dewleta tirk a dagirker ve hatin kirin, aşkera kir.
Li gorî raporê, li Efrîn û Girê Spî 3 jê jin, 4 jê zarok bi giştî 18 kes ji aliyê dagirkeran ve hatin revandin.
Agahiyên berfireh ên raporê wiha ne: “1’ê çileyê li navçeya Şêrawa ya Efrînê kesek, 2’yê çileyê li navçeya Raco kesek, 3’yê çileyê li navçeya Cindirêsê 4 kesên ji heman malbatê, li taxa Mehmûdiye ya Efrînê jî 4 kes ji heman malbatê, 7’ê çileyê li Cindirêsê kesekî 41 salî û 8’ê çileyê li Cindirêsê sivîlek hatin revandin. Her wiha li Girê Spiyê jî 6’ê çileyê 2 jê jin 6 kes hatin revandin.
Mehên dawî bi sedan kes li herêmên ku dewleta tirk dagir kirine, hatin revandin. Aqûbeta gelek ji wan nayê zanîn. Revandina mirovan a ji bo fîdye, gefxwarinê, îşkence û talanê, rojane rû dide.
22’yê kanûnê li navçeya Mabata ya Efrînê, çeteyên dewleta tirk Cephe Şamiye avêtin ser malan û herî kêm 150 sivîl revandin.
6’ê kanûnê li gundê Zidî yê navçeya Silûkê ya Girê Spiyê 7 kesên ji heman eşîrê ji aliyê dewleta tirk ve hatin revandin.
15’ê kanûnê li gundê El Elî Baciliye yê Girê Spiyê bav û kurek ji aliyê çeteyên tirk ve hatin revandin.
10’ê kanûnê li gundê Biyê yê navçeya Şêrawa ya Efrînê herî kêm 15 sivîl hatin revandin.”
