Rêxistina Tenduristiyê ya Cîhanê (WHO) di daxuyaniya xwe de ragihand ku di nava xwarina pitikan de ya li gelemperiya cîhanê tê amadekirin û firotin de rêjeya şekir zêde bûye
Li gorî daxuyaniya Rêxistina Tenduristiyê ya Cîhanê (WHO) derdora 8 hezar xwarinên amade yên li 500 firoşgehan hatin lêkolîn û hate ragihandin ku di nav xwarina pitikan a li gelemperiya cîhanê tê amadekirin û firotin de ji sedî 30 rêjeya şekir gelek zêde bûye ku dikare ji bo tenduristiyê metirsîdar be.
WHO’yê diyar kir ku xwarina ji şekirê zêde dikare kîloyê pitikan gelekî zêde bike û zirarê bide diranê wan.
Di daxuyaniyê de hate destnîşankirin ku pitikên xwarinên bi vî rengî dixwin, dema ku mezin dibin jî dixwazin xwarinên bi şekir bixwin û bi vî rengî bi wan ve tên girêdan û di daxuyaniyê de hat pêşniyarkirin ku di şeş mehên destpêkê de pitik tenê bi şîrê dayikê bê xwedîkirin.
Her wiha pêşniyar tê kirin ku ji bo pêvajo piştî şeş mehan heta du salan, li şûna şîrê amade pitik bi xwarina li malê tê amadekirin bê xwedîkirin. CENEVRE
