Halîse Aksoye seba ke cenazeya lajê xo Agît Îpeko ke serra 2017î de şerêko Dêrsimî de cuya xo vindî kerdbî bigîra muracatê heme cayan kerda. Tewr peynî di aşmî verê seba DNAye gonî dabî Dezgeyê Tibê Edlî (ATK) yê Stenbolî, labelê hema zî netîceyê testê DNAye ra çîyêk nêvejîyayo
Agît Îpekî 23ê gulana 2017î de bajarê Dêrsimî de şerêk de cuya xo vindî kerdbî. Badê ke Îpekî cuya xo vindî kerd keyeyê ci seba herînayîşê cenazeya xo kewt mîyanê hewldayîşan, labelê 2 serrî yo ke keye hema zî cenaze nêgirewto. Dayîka Agît Îpekî Halîse Aksoye seba herînayîşê cenazeya lajê xo muracatê Dezgeyê Tibê Edlî (ATK) yê Meletî û Serdozgerîya Komarî ya Dêrsimî daye. Labelê cenaze 2 serrî yo nêdîyaya keye.
Aşma hezîrane de gonî dayîk Aksoye ra ameye girewtene û ame vatene ke cenaze ATKyê Stenbolî de ya û do gonî bierşawî Stenbol. Dayîk Aksoye ard ziwan ke tu çîyêk testê DNAye ra zî nêvejîyayo.
Nêverdayî ke cenaze bêra teşhîskerdene
Badê ke tu çîyêk testê DNAye yê ATKyê Stenbolî ra nêvejîya, dosya reyna erşawîya Dêrsimî. Na rewşe ra dima bi rayîrê avûkatan dayîk Aksoye rê ame vatene ke ganî şêra Dêrsim. Sewbîna Aksoye seba teşhîskerdişê cenazeya lajê xo way û birayanê xo yê Stenbolî ra waşta ke cenaze teşhîs bikerî, labelê bi mehneya cenaze xira bîya û nîna naskerdene nêverdayî ke cenaze bêra teşhîskerdene.
Heta ke cenazeya lajê xo nêvîna do nêvindera
Aksoye dîyar kerde ke do roja dişeme şêra Dêrsim û aqûbeta cenazeya lajê xo bipersa. Dayîk Aksoye daye zanayene ke eke na reye zî çîyêk nêvejîyo do îdîayo ke yeno vatene cenaze cayêko Xozatî de ameya definkerdene de cigêrayîşan bikera û heta ke cenazeya lajê xo nêvîna do nêvindera. AMED
