Dewaya qetilkerdişê zanîstê kurdî Musa Anterî vizêr rîyê wextvîyartîşî ra ameye betalkerdene. Badê qerarî Komeleya Heqanê Merdiman a Anqara de eşkerayîya çapemenîye ameye dayene.
Eşkerayîye de verî Hemserekê Pêroyî yê Komeleya Heqê Merdiman (ÎHD) Ozturk Tukrdoganî qisey kerd. Turkdoganî vat: “Seba ke heqîqat vejîyo werte, kiştoxê Apê Musa û ê xeylêk kesanê bînan verê hukmî de hesab bidê ma têkoşîn kenê la pê nê qerarî kiştoxî ameyî pawitene. Heyetê mehekeme hewteyê verê ma de dewa peyde eşt û bizanayîş tarîxê 21ê êlule da ke yew roje badê wextravîyatişî yo. Dewleta Komara Tirkîya ewro reyna polîtîkaya bêcezayîye arde ca. Ewro reyna sozê xo nêtepiştî û çirey zî nêtepiştî. Apê Musa pê cînayetê dewlete ame qetilkerdene. Pê destê dewlete ame qetilkerdene. Çiwext îqtîdaro sîyasîyo demokratîk bêro Tirkîya o wext huqûqo mîyanneteweyî do bêro caardene û qerarê Mehkemeya Heqanê Merdiman a Ewropa bêrê caardene.”
Lajê Musa Anterî Dîcle Anter zî bale ante tarîxê dewa yê 21ê êlule ser û vat: “No tarîx bizanayîş ame vîjnayene. 20ê aşme de 30 serre kişîyayîşê pîyê mi bîyî de û rojêke dima mehkeme qerarê xo da. Xora ma verî ra zanayenê ke mehekeme do senî qerar bîgêro. Hukm bi temamî sey sîyasîyî yeno caardene. Eke hukm xoser bîyênî ma çîyo winayên nêciwîyayêne. Nê qerarî demokrasi, edalet û huqûq eciqnayî. Edalet û huqûqî derbe girewte. Pîyê mi reya dîyine ame kiştene. Çi heyf ke dewayê bînê ke dewam kenê do ê zî bêrê betalkerdene. Semedê qerarî 5 deqayî mabên dîya la 10 deqeyî qerar ame wendene. Qerar destê înan de amede bi.”
Rojnameger-nuştox Huseyîn Aykolî zî vat: “Roniştiş de Dîcle Anter û avûkatanê ci dersa merdimîye daye heyetê mehekeme. Rayîrê vejîyayîşî mojna la heyetê mehkeme qet gamêke nêeşete, tersayî. Semedê ma dewa nêqedîyaya. Ma rêçê Musa Anterî de çapemenîya xo gird kenê û aver şinê. Ê vanê qey pê qedînayîşê dewa eşkenê bidê vîrakerdene la ma do medê vîrakerdene.”
