Merkezê ci Anqara de çarçeweya tehqîqato ke ameybî akerdiş de 15 bajaran de operasyon pê ameybî û hemsekera Komeleya Rojnamegeran a Dîcle Firatî (DFG) Dîcle Muftuogluye zî mîyan de 16 rojnamegerî ameybî tepiştiş. Dîcle Muftluogluye roniştişê dewaye ke do 11ê temmuze de bêro dîyîş ra ver zîndanê Cinîyan ê Sîncanî ra venga tewrbîyayîşê roniştişî kerd.
Dîcleye mesajo ke şirawit de wina vat:
“Azadîya fikr û fehmî û çapemenîye her ke şino xira beno. Ceza, sansûr û astengîyê vernîya rojnamegeran xebatan ano merheleya vindarnayîşî. Goreyê dayeyanê rêxistinê meslekî; tena aşma hezîrane de hewteyê yewine de bi hezaran xeberî ameyî astengkerdiş, qedexekerdiş û sansûrkerdiş. Serra verêne de îqtîdar qanûna sansûrî kerd dewre û bi nê qanûnî reyde tabloya bîyaye hîna zêde giran bîye. Çîyo raşt caardişê îqtîdarî reyde qilif ameyo viraştiş. Îqtîdar bi destê muhakemekerdiş û hêzê asayîşî her game de hêrişê rojnamegeran keno. Hetê tewr tarî yê tabloye zî raştîya rojnamegerê tepişte ya. Goreyê raporê DFGyî yê aşmanê peyênan de hûmara rojnamegerê tepişteyî her ke şina zêde bena. Goreyê nê dayeyan 90 rojnamegerî ameyî tepiştiş. Bi nê tepiştişan hewl danê ke rojnamegeran bitersnê.
Aşma hezîrana 2022yî de 20 embazê ma ameyî destbendkerdiş, 16 rojnamegerî ameyî tepiştiş. Safîye Alagaşa ke dosyayê aye ame cîyakerdiş hetê mehkema ra serbest ameye verdayîş. 11ê temmuze de do 15ê ci tepişte 18 embazê ma bivejî vernîya mehkema. Yew serrî yo ke embazê ma tepişte yê. Do embazê ma bivejî mehkema û zîhnîyeto ke înan muhakeme keno, do bêro muhakemekerdiş. Embazê ma wexto ke ameyî tepiştiş Stenbol, Anqara û Amedî ra paştîdayîş ame mojnayîş.
Ez venga heme rêxistinê meslekî, pawitoxê heqan kena ke 11ê Temmuze de verê Edlîyeya Amedî de bêrê têhet û bi yew vengî vajê ‘Ma rojnameger û rojnamegerîye rê azadî wazenê’. Seba pawitişê ercê rojnamegerîye ma biqîrê. Ma pîya seba xelisnayîşê rojnamegerîye biqîrê.” ANQARA
