Êrîş û bombebaranên dewleta tirk a dagirker tu sînorên yasayî, hewayî û bejahî nemane derbaz nekirî ku di encama van êrîşan de bi dehan kesan jiyana xwe ji destdane û birîndarbûne. Her wiha encama bombebaranan de bi hezaran donim daristan şewitîne. Li dijî vê yekê her ku diçe nerazîbûn û hêrsa welatiyan zêdetir dibe. Welatiyên parêzgeha Kerkûkê di derbarê mijarê de ji Rojnews’ê re axivîn.
‘Di dîroka kevnar û îroyî de dijminên kurdan hertim hewl dane ku wan tune bikin’
Fatîh Mîrza qala êrîşên dagirkeriyê ya dewleta tirk a dagirker kir û wiha got: “Di dîroka kevnar û îroyî de, dijminên kurdan hertim hewl dane ku gelê me tune bikin û zirarê bidin wan, bi taybetî jî rejîma tirk. Raste nikare gelê kurd tune bike, lê hewla lewazkirina wan dide. Weke guriyan bi hevakariya xiyanetekarên navxweyî plana êrîşkirina li ser gundên Kurdistanê yên li herêma Biradostê dike.”
‘Sed salên din jî şerê kurdan bikin, wê têkbiçin’
Fatîh Mîrza di dewama axaftina xwe de destnîşan kir ku dijminên kurdan hertim têkçûne û wiha axaftina xwe berdewam kir: “Dewleta tirk hewl dide ku Kurdistana me xirab bike, lê başe şoreşgerên kurd, gerîlla û pêşmergeyên resen li dijî wan şer dikin. Tirkiye û hemû dijminên gelê me hertim têkçûne. Gelê kurd gelekî kevnare, dibe ku karîbe zerar û ziyanê bigihîne kurdan, lê nekariye ji xaka wan derbixîne. Pêwîste her kurdekê vê rastiyê bizane û dijminê xwe nas bike. Sed salên din jî şerê kurdan bikin, wê têkbiçin.”
‘Parastina Kurdistan û serweriya Iraqê erkê herkesî ye’
Welatiyê din ê ji Kerkûkê Mihemed Celîl balkişand li ser binpêkirina serweriya Iraqê de axivî û wiha pê de çû: “Parastina serweriya Iraqê erkê herkesê, dezgehê emnî, erkê hikûmeta Iraqê û Herêma Kurdistanê û aliyên peywendîdare ku van êrîşan rawestînin. Bi taybet divê Wezîrê Karên Derve li ser vê yekê bixebite, her hincetek divê bi rêya siyasî were çareserkirin.”
Mihemed Celîl di dawiya axaftina xwe de destnişan kir ku gelek welat serweriya xaka Iraqê binpê dikin ku ji vê yekê gelek bi fikarin, ji ber ku tevahiya Kurdistanê ji vê yekê zerarê dibîne.
