Endama Heyetê Rayberdişî yê Komeleya Cigêrayîşanê Kultur û Ziwanî ya Mezopotamya (MED-DER) Dîlan Guvenç bi wesîleya Roja Ziwanê Dayîke ya Dinya ANFyî rê qisey kerd.
Dîlane pare kerd ke ronîyayîşê Komara Tirkîya ra nata ziwanê kurdkî raştê teda û qedexeyan yena û vat: ”Dewlete seba ke nêeşkaye kurdan bi hawayêkê fîzîkî bi temamî qir bikera kena ke hetê kultur û ziwanî ra kurdan asîmîle bikera. Dewlete wexto ke merdimî bi kurdkî qisey bikerê cezaya pereyî danê înan. Bi taybetî des serranê peyênan de polîtîkayê asîmîlasyon û qedexeyî zêdîyayî. Dewlete seba ke kurdî nasnameyê xo ra dûrî bikewê pêro rayîran ceribnena.”
Dîlane ard ziwan ke polîtîkayanê neteweperestîye yê îqtîdarê AKP-MHPyî ra perwerdeyê bi ziwanê dayîke yeno astengkerdene. Dîlane vat: ”Dewlete kurdan û kurdkî çin hesibnena.Kurdîstan de polîtîkayê neteweperestî yê tewr giranî yenê caardene. Bi destê qeyûman dezgehê kurdan yenê qefilnayene, kurdkî yena qedexekerdene. Ma sey kurdan ganî ziwanê xo bipawê. Ganî ma keyeyê xo de û her ca de bi kurdkî qisey bikerê. Şarê ma xora wazeno bi kurdkî perwerde bivîno. Seba ke kurdkî biba ziwanê perwerdeyî ganî her warê cuye de vera qedexeyan têkoşîn bêro kerdene.” AMED
