Bajarê Wanî de badê ke Kurdî-Der bi KHKyî ame girewtene, Komeleya Cigêrayîşî yê Ziwan, Kultur û Hunerî (DÎSA-DER) serrêk de 500 kesan rê perwerdeyê ziwanî da
Tirkîya şerê îqtîdarî yê 15ê temmuze 2016 de, hukmatê AKPyî 20ê temmuze 2016î de Halo Nêalelade îlan kerd û bi Qerarnameyê Hukmê Qanûnîyan (KHK) qirê organîzasyonanê cimatkî yê sivîlan ard. Nê organîzasyonanê cimatkîyan ra yew zî Kurdî-Der bi. Dimayê girewtişê Kurdî-Derî ra DÎSA-Der abi.
Hewna hewteyêk serê kongreya ewilêne ya DÎSA-Derî ra nêşi, dewleta tirkî eşt serê keyeyanê îdarekaranê ci, înan ra xeylî kesî ameyî girewtene. Rixmê nê de zî DÎSA-Derî xebatê xo domnayî û şarî zî verê xo da DÎSA-Derî. Komele de tena kurdkî nê, atolyeyê Fariskî û Îngilîzkî zî estê.
‘Kenê ke domanê ke kuçeyan de xebetênê tewrê xebatan bikerê’
Hemserekê DÎSA-Derî Salîh Sertkalî vat no nizdê serrêk o ke komele akerda, komele de zafane atolyeyê ziwan, grûbê wendişî, grûbê edebîyatî estê û şar hîna zaf bala xo dano serê xebatanê Kurdkî. Sertkalî vat pîya bi kurdkî ê atolyeyanê Fariskî û Îngilîzkîyan zî organîze kenê, heta nika zî nizdê 500 hemwelatijan atolyeyanê înan de perwerde dîyo. Sertkalî heman wextî de hayîdar kerd ke atolyeyanê înan ra 3 hebî yê domanan ê, nika seba ke betlaneyê hamnanî yo, qey tewrbîyayîşê domanan ê atolyeyan ê xebatan kenê. Derheqê na babete de xusûsen ê kenê ke domananê ke kuçeyan de xebetênê tewrê xebatan bikerê û veng da her kesî ke na babete de hetkar bibê.
‘Ziwan neynika komelî ya‘
Hemserek Sertkalî vat seserra 21ine de hendî dewlete neçar menda ke seba perwerdeyê kurdkî gaman bierzo û vat eke ewro Îran de perwerdeyê kurdkî esto, ganî Tirkîya de zî no verî ra estbîyêne û va: “La çi heyf ke aqilê burokrasî yê Tirkîya aqilêko wina apeyperwer o ke Japonya de zî gama kursê ziwanê kurdkî yeno dayene, kena ke nê bido girewtene.”
Sertkalî qiseykerdişê xoyêpeyênan de vatişê fîlozofo Alman Schîllerî ‘Ziwan neynika neteweyî ya’ ard vîrî û va: “Gama ke ma ewnênê na neynike ra ma ûca şewqê xo vînenê. Na yewe ra ziwan sebebê estbîyayîşê şaran o. Eke şima ziwanêk çin kerê, şima do cimatî zî çin kerê.” WAN
