Endamê Koma Awazên Çiya, Seyîd Riza der barê Cejna Newrozê û peyama Koma Awazên Çiya ya ji bo Newrozê axivî.
Seyîd Riza di destpêkê de Cejna Newrozê li hemû gelê kurd û şervanên azadiyê pîroz kir û wiha got: “Newroza îsal cudatir e. Ji ber ku gelê me di jêr qirkirinê de ye. Di beramber de jî berxwedan û têkoşînek mezin tê raberkirin. Divê îsal em bigihin wê astê ku dagirkeran bişkînin. Em silavên xwe ji helwesta kurdên derveyê welat, serhildana rojhilatê Kurdistanê, şoreşa rojavayê Kurdistan, kurdên bakur û başûrê Kurdistanê re dişînin.”
Di dewamê de Seyîd Riza da zanîn ku divê qonaxê de berpirsyartiyek mezin dikeve li ser milê hunermendan û wiha domand: “Bi taybet hunermendên başûrê Kurdistanê divê bi erka xwe rabin. Kesên ku dibêjin em hunermendin û hunermend jî bê alîne, ne rast dikin. Ji ber ku huner ji gel û welatê xwe re alîgiriya rastî û heqiyê dike. Yên ji beriya hemûyan têkoşîn û pêşgentiyê ji gel re dikin hunermendin.”
Di dawiyê de jî Endamê Koma Awazên Çiya Seyîd Riza vê bangê li hunermendên başûrê Kurdistanê kir; “Divê hunermendên başûrê Kurdistanê bizanin ku divê qonaxê de erk û berpirsyartî dikeve ser milên wan. Her wiha divê rewşenbîr û nivîskar jî rê û rêbaza rast nîşanê gel bidin. Ji bona wê em bang li wan dikin ku bi erka xwe ya exlaqî, wijdanî, mirovî, dîrokî û çandî rabin. Destê xwe bixin bin kevir û xizmet û alîkariya gelê xwe bikin.”
