Komek jinên ji rojavayê Kurdistanê tev li nava refên PKK’ê bûn û li çiyayên Kurdistanê daxuyaniyek dan.
Daxuyaniya jinên ciwan wiha ye:
“Em; jinên ciwan ên ji Bakur û Rojhilatê Sûriyeyê, tecrîda li ser Rêberê xwe weke tecrîda li dijî tevahiya mirovahiyê dibînin. Bi rêya vê tecrîdê dixwazin pêşî li îdeolojiya azadiya jinan a Rêberê me bigirin. Bêguman ji ber ku nekarîn îrade û îdeolojiya Rêberê me têk bibin, berê xwe dan çiyayên Kurdistanê û gelê kurd ê li çar parçeyên Kurdistanê.
Lê belê li hemberî berxwedana gerîlayên YJA Starê ku her der kirine qada têkoşînê û li hemberî berxwedana jin ên berxwedêr ên ku felsefeya Rêber Apo pejirandine, nekarîn bisekinin û bi vî rengî armanca zîhniyeta desthilatdarîperest bi cih nehat anîn. Gerîlayên YJA Starê bi pêngavên Bazên Zagrosê û Cenga Xabûrê re careke din nîşanî dagirkeran dan ku nikarin li herêm û çiyayên Kurdistanê bimînin, wê rê nedin zîhniyeta baviksalar.
Dagirkeran bi rêya êrîşên şerê taybet ên mîna; destavêtin, fihûş, xapandina jin ên ciwan, revandin, destavêtin, destdirêjî û windakirina jin ên ciwan xwestin ku vê têkçûna xwe binixumîne. Her wiha di encama xiyaneta kurdên xayîn ên li başûrê Kurdistanê, jiyana jinên ciwan bi kapîtalîzmê û şerê taybet ve girê dan. Li hemberî van êrîşan berpirsyariya ku dikeve ser milê me ew e ku bi erka xwe ya pêşengiyê rabin, bersivê bidin pêvajoyê, bi vî rengî berê xwe bidin çiyayên azad ên Kurdistanê û tev li pêngava ‘Werin cenga azadiyê, dem dema azadiyê ye’ bibin.
Em dubare dikin ku ji bo bîranîna şehîdên şoreşê bi taybetî jî ji bo bîranîna şehîdên pêngavên Cenga Xabûr û Bazên Zagrosê em ê xwedî li têkoşînê derkevin, soz didin ku em ê têkoşîna xwe mezin bikin. Bêguman jinên ciwan ên cîhanê bi taybetî jî jinên ciwan ên Kurdistanê divê bi erk û berpirsyariya xwe rabin û ji bo serketina dîrokî ya mirovahiyê berê xwe bidin çiyayên azad.
Em soza xwe ya serkeftinê di destpêkê de ji Serokatî, şehîdan, gelê kurd û tevahî gelê cîhanê re, ji bo jinên ku bi zihniyeta baviksalarî hatiye kuştin nû dikin û em dibêjin ‘Dem dema azadiya jinan, gelê kurd û tevahî mirovahiyê ye’.” BEHDÎNAN
