Hozanên kurd Diyar û Emekçî bi klîbekê piştgirî dan berxwedana li dijî tecrîdkirina Rêberê Gelê Kurd Ocalan
Hozanên kurd Diyar û Emekçî têkildarî grevên birçîbûnê û rojiya mirinê klîbek amade kirin û gotin, wan xwestin ji aliyê xwe ve bibin beşek ji vê berxwedanê û bang li her kesî kir ku piştgiriya vê berxwedanê bikin.
Hozan Diyar û Hozan Emekçî bi rêya klîba xwe balê dikişînin ser grevên birçîbûnê. Gotin û muzîka stranê ya Hozan Diyar e. Navê klîbê jî Canlar Semahi ye.
Hozan Diyar wiha got: “Ya ku îro diqewime Semaha Canan e. Lewma divê Elewî hemû tevlî vê semahê bibin.” Hozan Diyar destnîşan kir, divê civak hemû bibe parçeyek ji vê berxwedanê û got ku faşîzm bi vî rengî dikare ji holê bê rakirin.
Hozan Emekçî jî da xuyakirin ku bêdengiya li pêşberî tecrîdkirina Ocalan tê wateya dûrketina ji nirxên mirovahiyê û wiha got: “Di serî de jin û ciwan, civaka Elewî divê mirovên ku ji bo siberoja me bedena xwe dane ber mirinê bi tenê nehêle. Divê em tevlî vê têkoşînê bibin.” AMED
