Dadgeha Mafên Mirovan a Ewropayê (DMME) di doza KCK’ê de Tirkiye mehkûm kir. Wê Tirkiye 2 hezar û 750 eûro tazmînat bide kesên hatine mexdûrkirin.
Di doza Sereke ya KCK’ê de ji bo 83 siyasetmedarên kurd ku tam 18 mehan nikaribûne derkevin pêşberî dadger û 15 mehan biryara nepeniyê li ser dosyeya wan hebû serî li Dadgeha Mafên Mirovan a Ewropayê (DMME) hatibû dayîn. DMME’yê, bi hinceta “binpêkirina azadiyê û mafên ewlehiyê” biryara xwe aşkere kir û li gor madeya 5’an (Mafê Azadî û Ewlehiyê) a Peymana Mafên Mirovan a Ewropayê (PMME) Tirkiyeyê mehkûm kir.
DMME’yê li gorî benda 4’an a maddeya 5’an a PMME’yê ji bo kesên ku serî lêdane Tirkiyeyê mehkûm kir û wê Tirkiye tazmînatê bide kesên hatine mexdûrkirin. Dê Tirkiye ji bo her her kesekî 250 eûro tazmînatê bide. Yanî dê bi giştî 2 hezar û 750 eûro bide kesên mexdûr.
Parêzer Reyhan Yalçindag Baydemîr, destnîşan kir ku ya hatiye kirin li hemberî siyaseta kurd defik bû, lê belê her çend wan di eywanên dadgehê de ev yek bilêv kiribû jî esas nehatibûn girtin û got: “Bi vê biryarî mafdariya me derket holê. Dadgeha Mafê mirovan bi biryara xwe aşkere kir ku li Tirkiyeyê di dosyeyên KCK’ê de 5 salan bi awayekî kêfî mafê mirovan hatine binpêkirin.”AMED
