Dewleta tirkî dewa Oleka Corî ya Bedlîsî de Goristanê Garzanî yê Bedlîsî ra 267 cenazeyî bê xebera merdimanê înan vetbî û eke muracatî nêrî kerdene do 233 cenazeyî goristanê bêkesan de bêrî defin kerdene.
Seke yeno zanayene dewleta tirkî dewa Oleka Corî ya Bedlîsî de Goristanê Garzanî ra 267 cenazeyî bê xebera merdimanê înan 19ê Kanûna 2017î vetbî û erşawitbî Dezgehê Tibê Edlî yê Stenbolî (ATK). Vetişê cenazeyan ser ro 443 rojî derbaz bî, labelê vîşêrê 2 cenazeyan heta nika cenazeyî nêdîyayî keyeyanê înan. Sewbîna aqûbetê 265 cenazeyan nîno zanayene. Herçiqas ke cenazeyî bi mehneya ‘testê DNA’ ameyî vetene, heta nika tena cenazeyê Dîlan Bîngole û Celal Ovmene dîyayî keyeyanê înan. Sewbîna aqûbetê 265 cenazeyan nîno zanayene û ATKyî de yenî vindetene.
Seba herînayîşê cenazeyan heta nika 32 keyeyî muracatê dozgerîye kerdî. Sewbîna 233 cenazeyî zî paweyê muracatî yî. Temsîlkarê Komeleya Heqê Merdiman (ÎHD) yê Tetwanî veng dayî keyeyan û waştî ke keye seba esteyanê domananê xo muracatê Dezgehê Tibê Edlî yê Stenbolî (ATK) bikerî. ÎHDyî ard ziwan ke eke muracat nêrî kerdene do esteyê 233 cenazeyan goristanê bêkesan de bêrî defin kerdene.
Pîyê Abdulhamit Donerî ke esteyê ci Goristanê Garzanî ra ameyî vetene, Şebap Doner dîyar kerd ke seba esteyê lajê xo 3 aşmî yo ke muracatê ATKyî kerdo û va: “Hema zî cewabêk nêdîyayo mi. Nêdayîşê cenazeyan çîyêko wijdanî û exlaqî nîyo. Wijdanê merdimîye de cayê çîyêko winasî çin o. Bellî nîyo ke ma do heta kemî wext bivinderî. Ez veng dana keyeyanê ke heta nika muracat nêkerdî ro. Wa şêrî û muracat bikerî. Heme keyeyê ke esteyê domananê înan goristan ra ameyî vetene, ganî muracat bikerî.”
Eskerê tirkî 19ê Kanûna 2017î de saetanê şewe de dewa Oleka Corî ya Bedlîsî de Goristanê Garzanî yê Bedlîsî ra cenazeyê 267 kesan bê xebera merdimanê înan vetbî û binimite berdbî Dezgehê Tibê Edlî yê Stenbolî (ATK) yê Stenbolî. Cenazeyî hema zî ATKyî de yenî vindetene. BEDLÎS
