Doktor Zekî Gulî derheqê astengkerdişê heqê tedawîbîyayîşî yê hepsîyan ke grevê vêşanîye de yî rê va: “Ganî seba taqîpkerdişê grevê vêşanîye sey serranê verênan heyetê doktoran yê xoser bêrî awankerdiş. Îşkenceyo ke vilayê wextî beno yeno kerdiş
Hemsereka Kongreya Komelê Demokratîke (KCD) û Parlamentera Partîya Demokratîke ya Şaran (HDP) ya Colemêrgî Leyla Guvene seba ke tecrîdo ke Rayberê Şarê Kurdî Abdullah Ocalanî bêro wedarnayîş, 8ê teşrîna peyêne de dest bi grevê vêşanîye kerde. Çalakîya Guvene roja 58. de dewam kena. Sewbîna rê 16ê kanûna 2018î ra nata zî çalakîya grevê vêşanîye yê 94 hepsîyan dewam kena. Çalakîye her ke şona hîna zaf hîra bena. Doktor Zekî Gulo ke 20 serranê peyênan de seba çalakîya grevê vêşanîye bin namayê Yewîya Tabîbanê Tirkî (TTB) û Weqfa Heqê Merdiman ya Tirkîye (TÎHV) de mîyanê heyetê doktoran yê xoser ameyî awankerdiş de ca gêno bale ant çalakîya grevê vêşanîye yê nika ser.
Gulî qiseykerdişê xo de dîyar kerd ke ganî seba taqîpkerdişê grevê vêşanîye sey serranê verênan heyetê doktoran yê xoser bêrî awankerdiş û wina va: “Weşî babetêka komelkî ya. Wexto ke heyetê xoser çinbî ercnayîşêko objektîf mumkun nîyo. Qasê ke ma çapemenî ra eşnawenî ge-ge vîtamînan nêdanî hepsîyan û gonîya ke yena pêşnîyazkerdiş nêdanî. Eke nê raşt bibî, yenî mehneya mudaxalekerdişê xoserîya doktoran û heqê weşî. Huqûq de çîyêk winasî çin o û heqê îdarekarê zindanan yê cezakerdişî çin o ke bikewî mabenê hepsî û doktoran. Tirkîye de grevê vêşanîye yê kehenan de zî sol û vîtamîn nêdîyayî hepsîyan. Prosesê peyênan de hûmara hepsîyan zî zêde bî. Ganî bi hawayo lez heyetê xoser bêrî awankerdiş. Ganî huqûqnas, keye û merdimê hepsîyan ra bigêr heme kesî çi kewenî milê ci ser bikerî. Ganî B1 û B2 bidîyî hepsîyan. Xeylê reyna wexto ke Wezîrîya Edaletî xitimîyaya veng daya TTByî.” ÎZMÎR
