Şaredarîya Çewlîgî ya AKPyî serra 2013î de mîyanê dormeyê dewanê Herragor, Havsel, Kardeşler û Qenterî yê Çewlîgî de Raşteyê Depokerdişî yê Eşteyan viraştbî. Dewijan vat ke depoyê eşteyî beno sebebê nêweşîyan û waştî ke ganî depo bêro wedarnayîş. Dewijî bado ke dîyî hetê selahîyetdaran ra netîceyêk nêvejîyeno kampanyaya îmze dayê destpêkerdiş. Cemîl Belîreno ke kampanya rayîr beno da zanayene ke tena 2 aşmanê peyênan de 36 domanî wedarîyayî nêweşxaneyan.
Belîrene vat ke eşteyê xeylê cayanê bînan zî erzîyenê tîya û vat: “Herême de enfeksîyonê gonîya sipî vila bîyo. Doktor vanê ke sebeb qilêrîya herême yo. Depoyê eşteyî zirar danê dar, vilik, vaş û pêro nebatan zî. Depo 400 metre dûrê dewa Kardeşlerî yo û vîşêrê eşteyê Çewlîgî eşteyê qezayanê ci, eşteyê qezaya Depî ya Xarpêtî û qezaya Licê ya Amedî zî tîya de yenê vengkerdiş.”
Belîrene qala seba çi kampanya dayî destpêkerdiş kerd û wina vat: “Tesîs seba 29 aşman dîyayo îhale. Tu îzahatê pêkerdişî çinî yo. Raporê ÇEDî zî fiyasko yo. Goreyê şertê Rêxistina Weşîye ya Dinya ganî tesîs 22 kîlometre dûrê cayanê cuye bibo. Wexto ke ma waştişname da şîrketî, ê qala mesafeya 250 metreyan kerdî. Coka ra ma dest bi kampanyaya îmzeyî kerd. Heta nika 6 hezar îmze ameyî arêdayîş. Hedefê ma arêdayîşê 20 hezar îmzeyî yo. Waştişê ma zaf zelal o. Ma wazenê depoyê eşteyî bêro wedarnayîş. Ma nêeşkenê tîya de berardiş bikerî. Domanê ma nêweş kewenê.” ÇEWLÎG
