Navenda Nûçeyan |
Serokkomarê Afrîkaya Başûr Cyrîl Ramaphosa ragihand ku oldar Demond Tûtû jiyana xwe ji dest daye.
Ramaphosa bi navê ‘Xelkê Afrîkaya Başûr’ êş û xemgîniyan xwe parve kir.
Xwediyê Xelata Aştiyê ya Nobelê ya sala 1999’an serpîskopos Tûtû bi piştgiriya xwe ya bi têkoşîna azadiyê ya Kurdistanê jî dihat naskirin.
Tûtû ji bo çareseriya pirsgirêka kurd a bi rêya diyalogê di mijdara 2012’an de Înîsiyatîfa Aştiyê ya Navneteweyî ragihandibû. Yên ku destpêkê mohra xwe danîn bin vê înîsiyatîfê jî lîderê rûhanî yê Tîbetê Dalaî Lama, Serokê Sînn Feînê Gerry Adams, ji serokên berê yên DYE’yê Jîmmy Carter bû.
Tûtû ku sala 2014’an dema ku êrîşên dagirkeriyê li ser Kobanê hat destpêkirin, li cem kurdan cih girt û beşdarî konferansên kurd ên li Parlamentoya Ewropayê bûbû. Demond Tûtû ku di heman demê de pêşengî ji lidarxistina van konferansan re dikir, sala 2018’an pêşengî ji Trîbûnal a Navneteweyî re kir ku dewleta tirk lê hat darizandin.
Tûtû yek ji aktorên girîng ên kampanyaya ‘Dema wê hatiye’ bû ku ji bo azadiya Rêberê Gelê Kurd Abdullah Ocalan hat destpêkirin. Yek ji 50 Xelatgirên Nobelê bû ku sala 2019’an li dijî tecrîdê bang kir.
Herî dawî di nîsana 2021’ê de bi navê Kampanyaya Aştiyê ya Kurdistanê mohra xwe danîbû bin nameya ji bo azadiya Rêberê Gelê Kurd Abdullah Ocalan.
