Cenazeyê 261 endamê HPGyî yê ke Goristanê Xerzanî yê dewa Oleka Jorî ya qezaya Bedlîsî de amebî definkerdiş, amebî vetiş, di peyerayîrê Goristanê Kîlyosê Stenbolî de amebî definkerdiş. Muracatê keye û Şubeyê Komeleya Huqûqnasê Seba Azadî(OHD) yê Stenbolî hetê Dadgeha Destûrê Asasî(AYM) ra ame redkerdiş û avûkatan dosya berdî Dadgeha Heqê Merdiman ê Ewropa (DMME).
Keyeyan heta nika bi rayîrê avûkatê xo bi behaneyê ‘Heqaretê ro vîrameyîşî kerdê’ û ‘îşkence û ezîyetî’ sere ro Serdozgerîya Komare ya Stenbolî dabî, la serdozgerî destûr nêda cipersayîşî. Serdozgerî reyna waştişê avûkatan ê ke ‘Destûr nêdayê cipersayîşê derheqê wezîfedaran’ û ‘ Betalkerdişê kirarîyan’ red kerd.
No ser de keyeyî, bi behaneyê ‘Heqê muhakemekerdişê edlî’ û ‘Heqê rêzgirewtişê ciwîya xusûsî û keyeyê ke ameyê binpaykerdiş’ sere ro Dadgehe ya Destûra Asasî dayî. Sewbîna avûkatanê OHDyî zî, Nîsana 2021î de, di çarçewaya heqê muhakemekerdişî de bi behaneyê ‘Heqê muhakemekerdişî yê edlî ameyo binpaykerdiş’ sere ro Dadgeha Destûrê Asasî dabî. Dadgeha Destûrê Asasî muracatê keyeyan û avûkatanê OHDyî erjnayî û wurdî muracatî zî red kerd.
Dimayê qerarê redkerdişî, avûkatanê OHDyî serê nameyê keyeyan de seba ke rayîrê huqûqî yê xomîyanî de qedîyayê, sere ro DMMEyî dayî. Di muracat de qalê bendê 8inê Pêkerdişê Heqê Merdiman ê Ewropayî ame kerdiş. Di benda 8ine de qalê ‘Hurmetê seba ciwîya xusûsî û keyeyî’ yeno kerdiş. Di eynî demî de seba ke cipersayîşêke baş î nêameyê kerdiş zî muracat ame kerdiş. STENBOL
