Qezaya Şaxî ya Wanî de 11ê êlule de babîyê 7 domanan Servet Turgut (55) û babîyê 8 domanan Osman Şîban (50) hetê leşkeranê ke vejîyabî operasyon ra ameybî destbendkerdene. Dima leşkeran wird hemwelatîyî helîkopterî ra eştî war. Hemwelatîyî wedarîyabi nêweşxane ke rewşa weşîye yê Turgut hema zî giran a û Osman Şîban zî servîsê ciewnîyayîşê giranî de yo. Hemwelatijan ra Servet Turguto ke 20 rojî beşê ciewnîyayîşê giranî de mend, dinyaya xo bedilnaye û Osman Şîban zî nika Mêrsîn de nêweşxaneyêk de yeno dermankerdene. Rojnamegerê ke no hedîse bi belgeyanê nêweşxaneyî vetî raşte ke 2 hemwelatijî hetê leşkeran ra helîkopterî ra erzîyayî war 6ê teşrîna verêne de ameybî destbendkerdene û 9ê teşrîna verêne de zî sewqê mehkema ameyî kerdene û mehkema bi îdîayê ‘endamtîya rêxistine’ derheqê rojnamegeran de qerarê tepiştişî daye.
Rojnamegerê Ajansê Mezopotamya (MA) Adnan Bîlen, Cemîl Ugur, Nazan Sala û rojnamegera Jinnewsî Şehrîban Abî ameybî tepiştene. Vilakarê Rojnameyê Yenî Yaşamî Fehîm Çetîner û vilakara rojnameyî ya verêne Şukran Erdeme zî bi şert kontrolê edlî serbest ameybî veradayene. Avukate Ebru Demîrtepe derheqê rewşa rojnameger Şerhrîban Abî û hemrayê aye ke ameybi tepiştene de qisey kerde.
Hukmat rojnamegeran xo rê sey tehdîd vîneno
Ebruye destpêkê qiseykerdişê xo de bale ante dosyayê rojnamegeran ser o û wina va: “Dosyayê rojnamegeran de tu delîlêk çin o. Dosyayan de tena qeydê veng estî û çîyê ke seba xeberan ameyî qiseykerdene, ameyî notgirewtene. Her çiqas ke delîl çinî bo zî ê sey ‘endamê rêxistine’ yenê muhakemekerdene. Qeydê veng zî tena qiseykerdişê timî yî. Xeberê binpaykerdişê heqan ê zîndanan ke rojnamegerî xebera înan viraştî zî dosyayan de ameyî cakerdene. Nê çîyan ra yeno fehmkerdene ke destê înan de tu delîlêk çin o. Derheqê muvekîla mi de aşmanê adar û sibate de tehqîqatêk dîyabî akerdeneç la badê xebera Servet Turgut û Osman Şîban muvekîla mi ameye tepiştene. Çimkî hukmat nêwazeno hedîseyê winasî bivejîyî raşte û înan xo rê sey tehdîd vîneno.”
‘Heqê şar esto ke raştîyan bizano’
Ebruye qiseykerdişê xo yê peyênan de dîyar kerde ke rojnamegerê ke saha de xebetîyenê timî yenê tehdîdkerdene û va: “Rojnamegerî raştîya bajaran nusenê û vanê. Ma huqûqnasî zî raştîya werte taqîb kenê û dosyayê winasîyan taqîb kenê. Kesê ke helîkopteran ra erzîyenê û kesê ke sînoran ser de yenê kiştene, hedîseyê raştîn ê. Muvekîla mi raştîyan raya pêroyî daye pêhesnayene. Dewlete nêwazena xeberê vera ci bêrê viraştene. Heqê şar esto ke raştîyan bizano. Rojnamegerî zî na çarçewe de wezîfeyê xo pê ardî. Medyaya hetgir de xeber çin a. La çapemenîya muxalîf ê sey Ajansê Mezopotamya û Jin Newsî de xeber zêde yî. Coka ra Ajansê Mezopotamya û Jin Newsî yenê sucdarkerdene. Tepiştişê rojnamegeran de mesajê ‘Eke şima xeberanê virazî ma do vajî şima girêdayeyê KCKyî yî’ yeno dayene.” WAN
