Artêşa tirke ya îşxalkere 14ê nîsane ra nata pê gazan û çekanê kîmyewîyan û bombayanê qedexekerdeyan hêrişê gerîlayanê azadîye yê Kurdistanî kena. Gerîlayê HPGyî Dr. Serbilind Dêrsimî derheqê hêrişanê bi çekanê kîmyewîyan de ANFyî rê qisey kerd.
Qiseykerdişê Dr. Dêrsimî ra tay noqtayê girîngî wina yê:
“Artêşa tirke peyman û qanûnan binpay kena û çekanê kîmyewîyan şuxilnena û her roje ma ser o gazê jehrînî û bombayanê qedexeyan erzena. Embazê ma vera nê hêrişan bi xurtî xo verdanê. Tewr peyên heyf ke 17 embazê ma bi çekanê kîmyewîyan şehîd bîyî. Dewleta tirke bi vateyê ‘artêşa tirke ya bişeref’ nê kerdişî red kerdî. Artêşa tirke de şeref cara çin o. Artêşa ke leşkeranê xo vêşnena xora nê hêrişanê kîmyewîyan qebul nêkena. Reyna înan vato ‘Eke ma artêşa tirke çekê kîmyewîyî bişuxilnayêne kincê pawitişî dayêne xo ra.’ La cara artêşa tirke nê çekanê kîmyewîyan dekena mîyanê kapsulî wina erzena. Dîmenanê ke embazan pare kerdê de aseno ke artêşa tirke cebilxaneyanê xo wina amade kena, dûrî ra verê tunelan de teqnena û gazî şinê zereyê tunelan.
Goreyê doneyan û muayeneyanê ma artêşa tirke tewr zaf gazanê ke fatisnenê şuxilnena. Nînan ra tewr dîyar zî gazê klorî yo. Warê şerî de zaf madeyî ameyî destvistene ke nînan ra yew zî asîtê hîdroklorîkî yo ke seba pakîye şuxiliyena. Dermanê şitişî asîtê sodyumhîpoklorît zî şuxilnena. Nê wird madeyan de zî asîtê klorî est ê. Nê wird madeyî wexto ke pêbenê gazê klorî hînî merdiman fatisnenê, çim û qirikî vêşnenê û kişenê. Artêşa tirke vana envanterê ma de çekê kîmyewî çin ê la nê bi xo warê şerî de benê gazê klorî. Artêşa tirke bi lûleyan nînan şawena mîyanê tunelanê şerî. Nê pêro pê dîmenan eşkera bîyî. Gazo ke embazê ma Baz Mordemî rê tesîr kerdo gazo winayên o. Coka fekê embazê ma ra awa sûr, pembe û qeweyî ameye. Na awe cigêran ra ameyêne.
Gazo ke embaze şehîde Helbeste Koçerîn rê tesîr kerdo, gazê narkotîkî yo. Mîyanê nînan de gazê bi kodê BZ ‘Buzz 15’ est o. Nînan ra yew zî madeyanê nakotîkî ra LSD yo. Nê madeyî pîya têbibê hînî eşkenê merdim bikişê. Sey fentanîlî gazê narkotîkî yê bînî zî est ê. Helbeste kîmyasalê winayênî ra şehîd bîya.
Dewleta tirke do nêeşka pê çekanê kîmyewîyan netîceyêke bivisna destî. Embazê ma xora kêm zî bibo tedbîranê xo gênê. Dewleta tirke ha bin kewena; şuxilnayîşê çeka kîmyewîye zî îsbatê ney o. Artêşa tirke nê gazan NATOyî ra gêna, gazê bi kodê CSyî Îngilistan de yeno berardene. Bi delîlan îsbat bîyo ke artêşa tirke çekê kîmyewîyî şuxilnayê. Ma venga rêxistinan û dezgehan danê ke bêrê herême de cigêrayîş bikerê. Seba cigêrayîşî destê ma ra çi bêro ma do sey HPGyî bikerê.”
