Tecrîdê Îmraliyî ke serê heme zîndanan û şarî de tesîr viraşto dewam keno. Aktîvîsta misirije Dr. Seher Hesen Ehmed derheqê tecrîdê vera Rayberê Şarê Kurdî Abdullah Ocalanî de ANFyî rê qisey kerd.
Dr. Sehere îfade kerd ke Ocalan lîderê kurdan o û ey bi parafîgmaya ‘Konfederalîzmê Demokratîkî’ pêro Rojhelatê Mîyanênî rê alternatîfêk pêşkêş kerdo. Dr. Sehere vat: ”Berhemê Ocalanî çimeyanê xo tecrubeyanê ey ê têkoşînê sîyasî û leşkerîyî yê şexsîyî ra gênê. Coka wendişê berhemanê ey seba afernayîşê teorîyan benê hetkar. Nê berhemen de derheqê sîstemê dinya yê nikayênî de analîz û cigêrayîşê cidîyî zî est ê.”
Tecrîdo ke Tirkîya ana ca sîyasetêko gemarin û zalim o
Dr. Sehere bale ante tecrîdê Îmraliyî ser û vat: ”Tecrîdo ke Tirkîya ana ca sîyasetêko gemarin û zalim o. No rejîm teyna tecrîdêko fîzîkî ney heman wextî de xîretêkê çinkerdişî yo sîstematîk o. Armancê sîstemê tecrîdî yê Îmraliyî no yo ke merdimî heqanê xo ra bêpar bimanê. Rixmê zulmî zî Ocalan Îmrali de xo ver dano ke no yew erjêko hîna pîl o.”
Rejîmê Îmraliyî yeno manaya qelsbîyayîşî
Dr. Sehere pare kerd ke estbîyayîşê rejîmêkê zorbazî yê Îmraliyî yeno manaya qelsbîyayîşê têgêrayîşanê komelkî û azadîgiran o û vat: ”Xîretê seba caardişê têdûştîya komelkî û edaletî hetê nê rejîmî ra yenê astengkerdene. Erjê azadî, edalet û heqanê merdiman pêro dinya de ganî bêrê parekerdene û caardene.”
