Endamê Komîteya Rayberdişî ya PKKyî Duran Kalkanî ANFyî rê qisey kerd û qalê girîngîya xopawitişî kerd. Qiseykerdişê Kalkanî ra tay noqtayê girîngî wina yê:
”Rayber Apo vano ‘Komelo ke xopawitişî nêkeno do çin bibo.’ No tesbît seba kurdan zî zaf raşt û girîng o. Ewro dişmen zî hêverî wazeno ke hişmendîya xopawitişî ya kurdan çin bikero. Seba ney hêriş keno.
Pêro dewletê neteweyîyî qirkerdişê komelî armanc kenê. Kurdî do senî xo bipawê? Wina; ganî kurdî bizanê ke binê gefê qirkerdişî û meseleya asayîşî de yê, hişmendîya dişmenê raştikênî bizanê û hêzanê dewlete rê nêvajê ‘hêzê asayîşî’, kurdî ganî bizanê ke ancax ê bi xo do bieşkê asayîşê xo bîyarê ca û seba caardişê asayîşî xo hetê hişmendîya xopawitiş, rêxistinîye û çalakîyan ra aver berê. Ganî kurdî vera hêrişan bingeyê xopawitişî de xo perwerde bikerê, rêxistin bikerê û çalakîyan bikerê.
Ganî kurdî pawitişê xo emanetê yewêdê bînî nêkerê. Xopawitiş hişmendî, rêxistinî û yewîya çalakîyan ra yeno pê. Coka ganî mefhumê xopawitişî bi hawayêkê raştî bêro pratîzekerdene.
Teyna kurdî ney pêro şarî bê pawitişê xo do nêeşkê azad bibê û biciwîyê. Xopawitiş yeno manaya ‘asayîşî.’ Asayîş zî îhtîyacanê merdiman ê bingeyînan ra yo. Eke cuyêke est ba ganî azad biba. Rayîrê cuya azade zî xopawitiş o. Êyê ke wazenê azad bibê ganî xopawitişî bîyarê ca. Dewlet û îqtîdaran çekî destê merdiman ra girewtî û artêşê xo awan kerdî. Ney zî asayîşê komelî binê gefan de verda.
Gerîlayî serkêş û fermandarê xopawitişî yê. Ewro şer hetê gerîlayan ra yeno kerdene. Seba ke gerîlayî û xopawitiş yewbînan temam bikerê ganî xopawitiş û gerîlayî yewbînan rêxistin û temam bikerê. Yanî ganî cinî û ciwanî na raştîye ser o bêrê perwerdekerdene.
Vakur de tay famkerdişê xeletî est ê. Ganî nê famkerdişî bêrê raştkerdene. Vakur de şar raştê qirkerdişî yeno. Ganî qirkerdişanê muxetemelan de çew pabeyê gerîlayan nêvindero. Xora gerîlayî do karanê rêxistinîye bikerê la ganî şar bi xo mesuldarîya tewr girînge bigêro xo ser.
Ewro vera cinîyan teda, hêriş û qirkerdişê giranî qewimîyenê. Sîstemê modernîteya kapîtalîste cinîyan rê qirkerdişî ferz keno. Coka seba cinîyan xopawitiş şert û mecburîyet o. Ciwanî ganî bibê hêzê komelî yê esasî. No zî bi xopawitişî beno. Eke ciwanî xo raşt perwerde û rêxistin bikerê eşkenê erkê xo yê xopawitişî bîyarê ca.
Sîstemê xopawitişî yê neteweya demokratîke de ganî şar waranê ekonomîk, sosyal û sîyasîyan de bi hawayêkê topyekûnî xo rêxistin bikero. Gerîlayê profesyonelî, komelo rêxistinkerde û xopawitişo herêmî sîstemê xopawitişî yê neteweya demokratîkî anê ca.
Rayber Apoyî tim wina ercna ke dewletanê neteweyîyan komelî bê pawitişê xo verdayê û vatêne ‘Komelo ke bêpawitiş mendo felaketêko tewr pîl o.’ Xopawitiş zî têkoşînêk o û ci rê wext lazim o. Oyo ke girîng o qerardarî, cesaret û fedakarî yê. Her ca de ganî têkoşînê azadîye û demokrasî de şîarê ma ‘Bêxopawitişî cuya azade nêbena’ bibo!”
