Vervatoxa HDPyî Ebru Gunay merkezê partîya xo de kombîyayîşê çapemenîye de rojdem ercna.
Qiseykerdişê Gunaye ra beşêk wina yo: “Îqtîdarî pê girankerdişê sîstemê tecrîdî yê Îmraliyî dişmenîya vera kurdan û çaresernêkerdişê meseleya kurdan da destpêkerdene. Birêz Ocalanî seba çareserîya meseleya kurdan pêşnîyazî kerdî û xîret kerd. La nika no hêzê çareserîye yeno tecrîdkerdene. Îqtîdar seba ke sîstemê faşîzmî awan bikero û sîyasetê înkarî rê dewam bikero tecrîd ano ca. Hemserekanê ma Pervîn Buldan û Mîthat Sancarî, Wekîlê ma Omer Ocalan û ez zî tede ma şîyî Wezîrîya Edaletî û seba pêvînayîşê bi Îmraliyî muracat kerd. Ma venga Wezîrîye danê ke wa cewabê pozîtîfî bida muracatê ma.
Amasra de 41 karkeran dinyaya xo bedilnaye. Nê pêro qeder nê cînayetê karî yê û mesuldarê ci îqtîdar o. Eşkera bi ke ocaxê madenî de tedbîrî nêameyê girewtene, peygoşîye ameye kerdene. HDP seba ke karkerî hînî nêmirenî têkoşîn keno û wayîtê vengê merdimanê ke wazenê bi asayî û sey merdiman bixebitê vejîyeno.
Îqtîdar 2018 ra nata bi dişmenî hêrişê Rojawanî keno û nê îşxalî bi qiseyanê ‘têkoşînê vera terorî’, ‘herêma asayîye’ pêşkêş keno. Pêro dinya zanena ke dewleta tirke seba ke kurdan mesele kena nê hêrişan kena. Mudaxeleyê Tirkîya ra ver Rojawan de aramî est bîye. Îqtîdarî pê hêrişanê xo modelo demokratîk ê Rojawanî kerd hedef. 2018 ra nata Efrîn de sûcê şerî yenê kerdene. Nika zî Efrîn de binê çimdarîya Tirkîya de cergî kewenê pê. HTŞ Îdlîb ra vejîya kewt Efrîn. Nê kerdişî xîretê gandarkerdişê DAIŞî yê. Tirkîya cerganê sey ê HTŞyî pawena û weye kena. Herêmanê binê îşxalê Tirkîya de hişmendîya DAIŞî newe ra vejîyena werte. La sey DAIŞî nê cergî zî do bêrê binkerdene.
Têna Efrîn de nê cayanê bînan de zî vera kurdan sûcê şerî yenê kerdene. Herêma Kurdistanî ya Federale ya Iraqî de hêrişê kîmyewîyî yenê kerdene. Şuxilnayîşê çekanê kîmyewîyan sûcê vera merdimîye yo. Ma venga îqtîdarî danê ke cade derheqê na babete de eşkerayîye bido û nê sûcî ra fek vera bido. Wa rayaumûmîye û dezgehî, Îdareyê Kurdistanê Federalî zî vera nê hêrişan bêveng nêmanê, mebê hemkarê nê sûcî û cigêrayîşan bikerê.” ANQARA
