Vervatoxa HDPyî Ebru Gunaye kombîyayîşêkê çapemenîye kerd û detayê Kampanyaya ‘Herkesî rê Edalet’ pare kerde. Qiseykerdişê Gunaye ra beşêk wina yo: ”Nê welatî de hînî edalet nêmendo û êyê ke îqtîdarî rê muxalefet kenê benê terorîst.
Ewro vera Birêz Abdullah Ocalanî tecrîdêko mutlaq esto. No tecrîd pêro zîndanan ra vila bîyo û heqê tepişteyan yenê binpaykerdene. Grevê vêşanîye yê tepişteyan ê vera nê kerdişan rıja 75. de dewam keno.
Ewro nê welatî de her kesî rê bêedaletîye yena kerdene. Merdimî bi hawayêkê keyfî yenê destbendkerdene, tepişîyenê, maruzê tedayan manenê, şaredarî û zanîngehan rê qeyûmî yenê tayînkerdene û her kesî rê vajîyeno ‘terorîst’. Ma nê kerdişan rê vanê ‘Hînî Bes o’ û her ca de sloganê ‘Her kesî rê Edalet’ qîrenê. Ganî ma edaletî rê rayîrêk akerê. Pêro derdê ma no yo.
Ma seba ke veng bidê edaletî 15ê Sibate de pê şîarê ‘Tecrîdî rê Bes o, Seba Cuye Edalet’ 3 baskan ra vera tecrîdî do rayîrî ra şorê. Ma seba ke bale biancê grevê vêşanîye eşkerayîyan bidê û çalakîyan bikerê. Ma do çarçewa kampanya de vera seksîzm, mîlîtarîzmi dişmenîya vera cinîyan, hêrişê serê kurdan zî çalakîyan bikerê. Seba ke bira Mehkemeya Heqanê Merdiman a Ewropa (MHME) ya seba Selahattîn Demîrtaşî zî bêra caardene ma do çalakîyan bikerê. MA do seba 8ê Adare, 1ê Gulane û 21ê Adare zî bernameyanê cîya-cîyayan do bikerê.
CPTyî verî raporê xo eşkera kerd û îsbat kerd ke Îmrali de tecrîd esto. La heman CPT zîyaretê xo yê peyênî de nêşi Îmrali. Ganî CPTyî Îmrali zîyaret bikerdêne. Çunke Tirkîya de pêro bêhuqûqîyî Îmrali de dest pêkenê. Derheqê na mesele de xîretê ma yê dîplomatîkî dewam kenê.” ANQARA
