Efrîn de ke hetê dewleta tirkî ra ameyo îşxalkerdene, daristanî bi zanayîşî yenê vêşnayene. Yeno vatene heta nika tewr tay 11 hezarî hektar daristan ameyo vêşnayene
Rejîmê tirkî Adar a 2018î de bajarê Efrînî îşxal kerd. Bi hawayêkê sîstematîkî hemverê merdimîye de sûcan kena, şer kena û xoza wêran kena.
Goreyê xebera ANHA, par ra nata Efrîn û dewanê ci de 11 hezarî hektar wareyê daristanî ameyo vêşnayene. Daristanê ke ameyê vêşnayene: Koyê Sari Sînê, Xirabê Simaq, Kurê, Kumreşê, Sûrkê, Cirqa yê qezaya Recoyî yê. Bi heman hawayî nizdê nîmeyê daristanê koyanê Bafiranê, dêzê Hawarî û Rişa Isiyî, koyê dewanê Rûta (koyê Geliyê Cehnimê), Remedana, Gurda yê qezaya Mabata. Daristanê dewanê Tetera, Hec Hesna, Qaziqli, Şêx Mihemed û Çûlaqa yê qezaya Cindirêsî. Daristanê merkezê gola Meydankî, daristanê Tetera, Qesîrî û Qaziqli yê qezaya Cindirêsî û heto ke keweno mabênê dewanê Gûbeka û Sêwîya yê qezaya Mabata.
Derheqê babete de endama raybere ya Heyetê Şaredarîya Şarî ya Herêma Efrînî Norşan Hisêne va: “Dewleta tirkî ya îşxalkare û çeteyê aye kenê ke demografîya kantonî her hetî ra bivurnê, koçberkerdişê ronişteyan, kiştiş û xeylî binpaykerdişanê heqanê merdiman kenê. Îşxalkarîya tirkî û çeteyê aye zanê ke ronişteyê Efrînî yê ke Şehba de manenê xoverdayîşî rê girêdaye yê, do hemverê terorî de bi ser bikewê. Naye ra îşxalkarîya tirkî dormeyê Efrînî wêran kena û daristanan vêşnena.”
Norşane tewr peynî veng da organîzasyonanê ke dormeyî dir têkildar ê û waşt ke hemverê binpaykerdişanê Tirkîya yê Efrînî de tê bigêrê. EFRÎN
