Endamanê Rêxistina Heqanê Merdiman a Sûrîye Kampa Serdemî ya ke tede efrînijî manenê de derheqê sûcanê dewleta tirke de eşkerayîyêke daye.
Vervatoxê Rêxistina Heqanê Merdiman Mihemed Ebdoyî eşkerayîye wende. Ebdoyî da zanayene ke dewleta tirke ya îşxalkere 2018 ra nata kena ke demografîya Efrînî bivurna û tede sûcanê şerî kena.
Goreyê eşkerayîye bîlançoya sûcanê dewleta tirke ya hewt mengan wina ya: ”
- 24ê ci cinîyî 208 sivîlî ameyî remnayene, domanêka kênaye rê tecawuz ame kerdene.
- 3yê ci cinîyî 13 kesî ameyî qetilkerdene.
- Tewr tay 17 hezar darî birîyayî, 70 hektar axpînî ameyî vêşnayene.
- 5 cayê tarîxîyî ameyî wêrankerdene.
- 8 kolonîyî ronîyayî, endamê rêxistinanê Kendavê û Filîstînî nînan de ameyî cakerdene.
- Dewleta tirke kena ke Efrîn de tirkî bêra qiseykerdene, bînayan de ala tirkan yena dardekerdene.
- Dewleta tirke nameyê meydananê sey Meydanê Azadî vurnayî û nameyê înan sey ‘Meydanê Ataturkî’ vurnayî. Dibistananê Efrînî de ala tirkan û perwerdeyê tirkî est ê.
- Dewleta tirke ya îşxalkere rayîrê trenî Mîdan Ekbes kerd ra û rot bazirgananê Ezazî.
- Dewleta tirke 30 bînayê kolonîyî awan kerdî û nînan de cerg û milîtanê Îxwanî cakerdî.
- Dewleta tirke her roje hêrişê waranê kurdan kena, bi zorî kurdan dana koçkerdene.”
Eşkerayîye de dîya zanayene ke dewleta tirke bêvengîya hêzanê mîyanneteweyîyan û hêzanê garantoran ra paştî gêna û sûcanê xo rê bêmabên dewam kena. Eşkerayîye de sere de Neteweyê Yewbîyayeyî venga pêro komelê mîyannetewyî, hêzanê mîyanneteweyîyan û rêxistinan dîya ke wa verê sûcanê dewleta tirke bigêrê, dewleta tirke mehkemeya mîyanneteweyîye de muhakeme bikerê û seba agêrayîşê efrînijan têbigêrê. ŞEHBA
