Dagirkeriya Tirk û çeteyên wê li gel bêdengiya navdewletî û rêxistinên hawîrdorê daristanên Efrînê dişewitînin. Zeviyên ku zirar dîtine bi qasî 11 hezar hektarî ye.
Dagirkeriya Tirk û çeteyên wê ji 20`ê Çileya 2018`an ve rêzebinpêkirinên xwe li Efrînê didomînin. Dagirkeran şêniyên Efrînê yên resen dan koçberkirin, milkên şêniyan talan dikin û bi rêya bicihkirina malbatên çeteyan demografiya Efrînê diguherînin û bi awayeke hovane dartistanên Efrînê dişewitînin.
Ji sala borî ve derdora bi qasî 11 hezar hektarî daristanên Efrînê ji gund û navçeyên Efrînê hatine qutkirin û şewitandin. Daristanên ku hatine şewitandin ev in: Çiyayên Sari Sînê, Xirabê Simaq, Kurê, Kumreşê, Sûrkê, Cirqa yên navçeya Reco. Her wiha derdora nîvê daristanên çiyayên Bafiranê, keleha Hawarê û Rişa Isiyê, çiyayên gundên Rûta (çiyayên Geliyê Cehnimê), Remedana, Gurda yên navçeya Mabatayê. Daristanên gundên Tetera, Hec Hesna, Qaziqli, Şêx Mihemed û Çûlaqa yên navçeya Cindirêsê. Daristana navenda gola Meydankî, daristanên Tetera, Qesîrî û Qaziqli yên navçeya Cindirêsê û rûbera di navbera gundên Gûbeka û Sêwiya li navçeya Mabatayê.
Girêdayî mijarê endama rêveber a Desteya Şaredariya Gel a Herêma Efrînê Norşan Hisên got “dagirkeriya Tirk û çeteyên wê hewl didin demografiya kantonê ji tevahiya aliyan ve biguherin, ji koçberkirina şêniyan, kuştin û gelek binpêkirinên ku di eniya mirovahiyê de lekeyek in”.
Norşan wiha domand: “Dagirkeriya Tirk û çeteyên wê dizanin ku şêniyên Efrînê yên ku li Şehbayê dimînin bi berxwedanê ve girêdayî ne û dê li dijî terorê bi ser bikevin. Ji ber wê ye ku dagirkeriya Tirk hawîrdora Efrînê talan dike û daristanan dişewitîne.”
Di dawiyê de Norşan bang li rêxistinên têkildarî hawîrdorê kir ku li dijî talan û wêrankeriya Tirkiyê bilivin û nehêlin daristanên Efrînê tune bibin. ŞEHBA
