Nêrazîbîyayîşê vera hêrişanê dewleta tirke yê serê goristananê gerîlayanê HPGyî dewam kenê. Hemserekê Komeleya Paştdayîşî û Hatkarîya Keyeyanê ke Merdimê Xo Dergûşê Şaristanîye de Vîn Kerdî (MEBYA-DER) Şeyhmuş Karadag, Hemserekê Şubeyê Amedî yê Komeleya Heqanê Merdiman (ÎHD) Abdulah Zeytûn û endamê Komeleya Huqûqnasan a Seba Azadîye (OHD) Muhîttîn Muguçî derheqê babete de ANFyî reyde qisey kerd.
MEBYA-DER: Konseptê Şerê Taybetî
Karadagî da zanayene ke dewleta tirke pê nê hêrişan mojna ke vera şarê kurdî û merdimîye wayîra tewirêkê senînî ya û îfade kerd ke konseptêkê şerê taynetî dewre de yo. Karadagî vat: ”Pê nê hêrişan vanê ke ‘Ma şima rê qedexe kenê ke şima wayîrê merganê xo bivejîyê.’ Dewlete wazena ke tengasîya xo ya ekonomîke û sîyasîye pê şarê gemarinî yê vera kurdan bivejê û komel bêveng bikerê.
Definkerdişê cenazayan û hûrmetê seba goristanî heqêko huqûqî yo. Na meseleyêka merdimîye ya. Pê nê kerdişanê xo dewlete dewlete tewirê xo mojnena. Vera şarê kurdî ‘Planê Çinkerdişî’ ana ca. Ganî nê hêrişî hêrişanê vera Zînî Wertê û Mexmûrî ra cîya nêrê ercnayene. Konseptêko pêroyî yê hêrişî esto. Ma rayîr û metodê ney teşhîr bikerê. Ma xîret kenê ke başa rayaumûmîye biancê na mesele ser. Semedê vîrusê Korona ra ma nêeşkenê zaf têbigêrê. La eke hewce bibo ma do goristanan de nobete zî bigêrê. Ma keyeyan reyde dîyalog kenê. Gorî hesasîyetê dînî yê zî. Ma naye ra dezgehanê dînîyan reyde zî nîqaş kenê ke ma bieşkê se bikerê. Se beno wa bibo ma do vera nê hêrişan bêveng nêmanê. Ma do nêverdê ke îqtîdar polîtîkayanê xo yê gemarinan goristanan ser o bikerê. Ganî dezgehî hunermendî, akademîsyenî, roşnvîrî, rîsipîyî û partîyê sîyasîyî vera nê hêrişan nêrazîbîyayîşê xo bimojnê. Ma do paştî bidê keyeyan û na babete teqîb bikerê.”
Hemsereke ÎHDyî yê Amedî Abdullah Zeytûnî zî derheqê babete de nê çîyî ardî ziwan: ”Huqûq de, bawerîyan de komel de cayê hêrişê vera goristanan çin o. Êyê ke no kerdiş ard ca ganî derheqê înan de tehqîqat bêro kerdene. Nê hêrişî heman wextî de goreyê peymananê mîyanneteweyîyan çarçewa qedexeyê kerdişan ê xiraban de yenê ercnayene.”
Avûkatê OHDyî Muhîttîn Mugaçî zî bale ante prosesê huqûqî ser û vat: ”Prosesê huqûqî bi hawayê gerrakerdişî eşkîyeno bêro kerdene. Eke keyeyî muracat bikerê ma do paştî bidê înan. Eke mekanîzmaya huqûqê zereyî ra netîceyêka musbete nêra destvistene, muracatê Mehkemeya Ceza ya Mîyanneteweyîye do bêro dayene. Rew yan zî erey netîce do bêra girewtene.” AMED
