Komeke çalakgerên ku navê ‘Îsyana Benzînê’ li xwe kirine, li Stockholm a Swêdê bi êlekên zer daketin qadan û çalakî li dar xist. Çalakger dixwazin ku bihayê benzînê ji 17 kronan dakeve 12 kronan
Li welatê Swedê komekê bi navê ‘Îsyana Benzînê’ ku xwe li ser platforma medyaya civakî ya Facebookê birêxistin kiriye û ji çalakgerên Êlêk Zer ên Fransayê bibandor bûne, şevê din li paytext Stockholmê çalakî li dar xist.
Koma ‘Îsyana Benzînê’ ji nêzî 400 kesan pêk tê. Ji endamên komê beşek jê êlekên zer li xwe kirin û li Qada Sergelstorg a Stockholmê kom bûn û ber bi avahiya parlamentoyê ve meşiyan. Çalakgeran bê navber dirûşmên ‘baca benzînê kêm bikin’, ‘desthilatdariya gel’ û ‘êdî bes e’ berz kirin. Li pêşiya parlamentoyê 5 parlamenterên endamê Partiya Moderat (Mûhafazakar) çalakger pêşwazî kirin.
Çalakgeran 150 hezar îmzeyên ku ji bo xistina baca benzînê kom kiribûn radestî parlamenterên Partiya Moderat kirin û nerazîbûn nîşanî partiyên din ên siyasî dan.
Rêxistina bi navê ‘Îsyana Benzînê’ dixwazin ku lîtreya benzînê ji 17 kronan dakeve 12’an. STOCKHOLM
