Jinên RJAK’î ji bo Leyla Guven a 128 roj in di greva birçîbûnê de ye, peyam şandin û gotin ku ew ê bi rengê Leyla bijîn, têbikoşin û bi ser bikevin
Rêxistina Jinên Azad ên Kurdistanê (RJAK) ji bo hevseroka KCD û parlamentera HDP’ê ya Colemêrgê Leyla Guven a 128 roj in li dijî tecrîdkirina Rêberê Gelê Kurd Abdullah Ocalan di greva birçîbûnê de ye, nameyek şand.
Nameya ku bi ser navê ‘Jina rojê, dayika pîroz û jina berxwedêr’ hat nivîsandin, wiha hat gotin: “Em ji cih û warên Leyla Qasiman, Leyla Waliyan, ji bo cih û warên Leyla Guvenan bi silavên herî xweşik dibin merheba. Berxwedêr li dijî hêzên şer nîşaneya îrade, bawerî, hezkirin û serketinê ne.
Di peyama RJAK’ê de hat ragihandin ku Guven bûye rastiya raperîner, ziman û dengê jinên mafên wê hatine tepisandin û wiha hat domand: “Wêrekiya we ya mîna okyanûsan bêdawî, hêz û moralê dide me jinên başûrê Kurdistanê. Leheng ew kes in ku ruhê serdemê baş dibînin û dîrokê dinivîsînin. Tenê ew bûne zimanê hezkirinê, hêviyê û hesreta winda. Ji ber vê yekê, mafê lehengan e ku bibin ziman, deng, qîrîn, çalakî û serketina civakê. Tu îro bûye rastiya raperîner, ziman, dengê jinên nav, nasname, ked û wateya xwe hatiye tunekirin.”
RJAK’ê ragihand ku hêza vîna Guven tirsê dixe dilê zaliman, kelecanê dide mezlûman û wiha got: “Tu bûye senteza lehengên li ser vê axê hemûyan û bi vî rengî li dil û mejiyan neqişiya.”
Her wiha RJAK’ê destnîşan kir ku deng û çavên bi coş ên Guven dê wijdanên korbûne teqez bilivîne û name wiha bi dawî bû: “Em jinên RJAK’î sekna te ya xwedî îrade ku nîşaneya dilsoziya azadiyê ye, dişopînin. Wêneyê ku te xêz kir, strana te got, dengê me hemûyan e. Tu bûye nav, deng û çalakiya azadiyê ya jinan hemûyan. Tu yê weke jineke evîndar û pîroz di têkoşîn û dilê me de her hebî. Em sozê didin ku bi rengê Leyla bijîn, têbikoşin û bi ser bikevin.”
