Meclisa Ciwanên Partiya Demokratîk a Gelan (HDP), derbarê zext û operasyonên binçavkirinê li ser endam û rêveberên xwe de daxuyaniyek nivîskî weşand. Di daxuyaniya ku ji aliyê Buroya Çapemeniyê ya HDP’ê ve hat weşandin de, bertek nîşanî zext, revandin, ferzkirina sîxurî û binçavkirinan hat dayîn.
Di daxuyaniyê de hat diyarkirina ku desthilatdariya ku tu rewabûna wê nemaye, dixwaze bi hêzên tarî welat bi rêve bibe û wiha hat gotin: “Em dixwazin hemû beşên civakê bi awayekê mirovî bijîn û em vê yekê diparêzin. Em carek din, dixwazin bêjin ku em ê jiyanek azad ava bikin. Em ê tecrîd tune bikin û faşîzmê hilweşînin.”
Meclisa Ciwanên HDP’ê, di daxuyaniya xwe de ev peyam da: “Bi gelan, ciwanan, jinan û zarokan serdemeke herî bi qirêj a dîrokî tê jiyîn. Desthilatdariya faşîst a AKP û MHP’ê, her roja diçe, asta faşîzmê bilind dike û dixwaze civakê bê nefes bihêle. Di şexsê gelê kurd de êrîşî hemû nirxên gelan dikin û hewl didin civakê bi tenê ava bikin. Lê em ê di her qadên jiyan û siyaseta demokratîk de cih bigirin. Em ê têkoşîna xwe bidomînin û em bi biryar in ku wan ji textê wan bînin.” ENQERE
