Meclisa Kongra Star de barê 8’ê Adarê Roja Jinan a Cîhanê daxuyaniyek nivîskî weşand.
Di destpêka daxuyaniyê de 8`ê Adarê di şexsê Roza Luksemburg û Leyla Qasim, Leyla Şaylemez, Sakîne Cansiz, Fîdan Dogan, Jîna Emînî, Tolhildan, Nagîhan, Hind, Seida, Çîçek, Zeyneb û şehîdên din de li hemû jinên cîhanê hat pîrozkirin û wiha hat gotin: “Ev roj temsîla ruhê berxwedan û têkoşîna jinan e. Em Rêber Abdullah Ocalan ku bi talîmata xwe nîşan da ku ew hevalê rast ê jinan e, silav dikin. Jinên cîhanê û şehîdên azadiya jinan bi rêz û minetdarî bi bîr tînin.”
Di dewama daxuyaniyê de Serhildana bi pêşengiya jinên rojhilatê Kurdistanê-Îranê jî hat silavkirin û bal hat kişandin ku dirûşmeya “Jin, Jiyan, Azadî” bûye slogana hevpar a tevahî jin û civakên ku azadiya xwe di azadiya jinan de dibînin.
Di dewama daxuyaniyê de hat destnîşankirin ku jinên Rojava û Bakur û Rojhilatê Sûriyeyê bi têkoşîn û îradeyeke mezin berxwedan û têkoşîna azadiyê gihandin asta herî jor û ev tiş hat gotin: “Meşa berxwedan û têkoşînê ya ji mîrateya dîrokî ya berxwedana jinên di kargeha tekstîlê de dixebitîn heta roja îro didome. Em soz didin ku em ê heta serkeftinê berxwedan û têkoşînê bidomînin. Em bang li hemû jinan dikin ku heta serkeftina azadiyê li qadan bin. Têkoşîna di hemû qadên jiyanê de wê bibe rêya rizgarî û bidawîkirina tundiya li ser jinan. Em weke rêxistinên jinan ji bo azadiya hemû jinên cîhanê divê her kêlî li ber xwe bidin.”
