Di 2’yê îlonê de aloziya li Kerkûkê rû dabûn de 4 kesan jiyana xwe ji dest dabûn û 15 kes jî birîndar bibûn. Rewşenbîrên Şaxa Rewşenbîrên Iraqê ya Kerkûkê ku di nava wan de ji hemû pêkhateyên bajêr rewşenbîr hene, têkildarî aloziyên di rojên dawî de li Kerkûkê derketine, civiyan û piştre jî daxuyaniyek dan çapemeniyê.
Li ser navê rewşenbîran Feysel Hemewendî daxuyanî da û got ku aloziya li Kerkûkê cihê xemginiyê ye û wiha axivî: “Komek bi navê xwepêşandana li dijî partiyek kurdî rêya sereke ya Kerkûk-Hewlêrê girtin. Li wê derê zext bi hemwelatiyên kurd hat kirin. Em rewşenbîrên bajêr ên kurd, ereb, tirkmen û Mmesîhî her tiştên ji bo xirakirina aramiya bajêr şermezar dikin. Em di heman demê de şehîdxistina çar Kurdan jî şermezar dikin.”
Di berdewama daxuyaniyê de Hemewendî daxwaz kir ku di zûtirîn demê de divê kujer werin cezakirin û tazmînatên maddî û manewî li malbatên cangoriyan were belavkirin. Hemewendî bang li serokwezîrê Iraqê kir ku bila biryarê bide leşker û wesayîtên leşkerî yên ku li nava taxên kurdan hatine belavkirin, werin vekişandin û wiha dawî li axaftina xwe anî: “Em ê qebûl nekin tu kes û aliyek ji bo alozkirina rewşa bajêr gel teşwîqî xwepêşandanan bikin.”
