Di çalakiya Nobeta Demokrasiyê ya li Mêrdînê parlamentera HDP’ê Ebru Gunay anî ziman ku vîna wan ji hêla qeyûman ve hatiye xespkirin û dê rê nedin vê yekê. Gunay bi lêv kir ku pergala hevserokatiyê jî ne pergaleke wisa ye ku bikeve destê qeyûman
Partiya Demokratîk a Gelan (HDP) a Mêrdînê li dijî biryara tayînkirina qeyûm di roja 36’emîn de jî çalakiya Nobeda Demokrasiyê li dar xist. Îro ji ber ku walîtiya Mêrdînê hemû çalakî qedexe kirine, beriya ku rêveber û parlamenterên HDP’ê dest bi çalakiyê bikin bi sedan polîs li dora avahiya HDP’ê kom bûn û avahî dorpêç kirin.
Ji ber ku polîsan avahiya HDP’ê dorpêç kir, rêveber, endam û parlamenterên HDP’ê çalakiya xwe li avahiya HDP’ê berdewam kirin. Di nobetê de parlamentera HDP’ê ya Mêrdînê Ebru Gunay axivî û diyar kir ku dê şaredariyên xwe ji qeyûm re nehêlin. Gunay anî ziman ku bi destê qeyûm vîna kurdan hatiye xespkirin.
Gunay bi lêv kir ku li dijî xespê ev e 36 roj in li ber xwe didin û wiha domand: “Mirov dikare têkildarî qeyûman gelek tiştan bibêje. Lê ev têra vegotina xespa hatiye kirin nake. Tayînkirina qeyûm bi şaredariyên Pasûr û Qereyaziyê re odm dom kir. Em ê vê xespê qebûl nekin. Em ê heta dawiyê destkeftiyên xwe biparêzin. Pergala me ya hevserokatiyê ne ew pergal e ku têkeve destê qeyûman. Hevserokatî xeta me ya mor e.”
Di berdewamê de jî Gunay anî ziman ku desthilata AKP-MHP’ê hemû mafên hêz û gelên muxalîf xesp dike û wiha pê de çû: “AKP-MHP weke rêbazeke birêvebirinê serî li vê didin. Gelê Mêrdînê jî ev rastiye bi aşkerayî dît. Dîtin bê ka qeyûm bacên gel ji bo çi û li ku dimezêxe. Em ê şaredariyên xwe yên ku bi keda gelê me hatine bidestxistin ji wan re nehêlin.”
Çalakî bi dirûşman bi dawî bû. MÊRDÎN
