Şervanê HSD’ê Dilşêr Endok ku li gundewarên navçeya Til Temirê li dijî dagirkeriya dewleta tirk li ber xwe dide, destnîşan kir ku ew ji bo gel û xaka xwe fedakar in û dê heta dawiyê axa xwe ji dagirkeran biparêzin
Ji 9’ê Cotmeha derbasbûyî ve, dagirkeriya dewleta tirk û çeteyên wê DAIŞ û Cebhet El-Nusre, êrîşî herêmên bakur û rojhilatê Sûriyeyê dikin, di êrîşan de hemû çekên giran û qedexekirî bikar tînin.
Hêzên Sûriyeya Demokratîk (HSD) jî di çarçoveya mafê parastina rewa de, bersivê didin hewildanên pêşdehatina dagirkeriya tirk û çeteyên wê ber bi gundên Qadisiyê, Ezîziyê, Dawûdiyê û Erîş ên navçeya Til Temirê û şervanên HSD’ê heta niha hemû hewldanên pêşhatina dewleta tirk şikandine.
Di vê çarçovê de şervanê HSD`ê Dilşêr Endok ê di eniyên pêşîn ên gundên Erîşa û Dawûdiyê de cih girtiye, li ser rewşê ji ajansa ANHA’yê re axivî.
Endok destnîşan kir ku dagirkeriya tirk û çeteyên wê yên DAIŞ û Cebhet El-Nusre, rexmî ragihandina qaşo agirbestê ya dagirkeriya tirk û Amerîkayê lê êrîşên xwe nerawestandine û gund û bajarokan topbaran dikin.
‘Berxwedana me didome’
Endok da xuyakirin ku berxwedana wan li hemû eniyan di çarçoveya mafê parastina rewa de berdewam dike û got ku di rojên dawî de li eniyên Zirgan û Til Temirê derbeyên giran li artêşa dagirkeriya tirk û çeteyên wê dane.
‘Tevahî êrîşên wan vala hatin derxistin‘
Şervanê HSD`ê da zanîn ku dagirkeriya tirk û çeteyên wê zêdeyî gelek caran hewl dan xeta eniya pêşîn a hêzên HSD`ê li gundê Qasimiyê, Ezîziyê, Dawûdiyê û Erîşa yên naveya Til Temir bişikînin, lê tevahiya êrîşên wan vala hatin derxistin û paşde reviyan.
‘Em li ser soza xwe ne’
Her wiha Endok diyar kir ku wekê HSD’ê li ser soza xwe ya bi gel û şehîdên xwe re dane, dimînin û dê heta dawiyê parastinê bikin û axaftina xwe wiha bi dawî kir: “Bila dagirkeriya tirk û çeteyên wê bizanibin, em ew şervanê ji bo parastina tevahiya pêkhateyên gelê xwe û xaka xwe fedakariyan didin in û em ê aştiyê û aramiyê pêk bînin, em xwedî maf in û di dawiyê de em ê bi ser bikevin.” HESEKÊ
