Kongreya Civaka Demokratîk (KCD), Partiya Herêmên Demokratîk (DBP), Tevgera Jinên Azad (TJA) û Partiya Demokratîk a Gelan (HDP) li dijî operasyonên binçavkirina siyasetmedarên HDP’yî, binçavkirina jin û rêxistinên civakî yên sivîl û bi boneya nexşerêya pêvajoya serdema bê li Cemiyeta Rojnamevanan a Başûrrohilat a Amedê daxuyanî dan çapemeniyê.
Hevserokê KCD’ê Berdan Ozturk, Hevserokên DBP’ê Salîha Aydenîz û Keksîn Bayindir, parlamenterên HDP’ê Îmam Taşçier û Remziye Tosûn, Hevserokên HDP’ê ya Amedê Zeyyat Ceylan û Hulya Alokmen Ûyanik, rêveber û endamên HDP û DBP’ê, atkîvîstên TJA’yê beşdarî daxuyaniyê bûn. Beşdaran di daxuyaniyê de pankarta ‘Em yekitiyê saz bikin, tecrîdê bişkînin, azadiyê pêk bînin’ vekirin.
Daxuyaniya hevpar ên sazî û rêxistinên kurdan wiha ye:
“Ev dused salên dawî, di pirsgirêka kurd de, jiyana gelên me yên têkoşer; her dem bi zext, zor, çewisandin, her cûre bê edaletî û qirkirinan derbas bû. Di heman demê de pergala qirêj; dol û newalên me deşt û çiyayên me, gund û bajarên me, sewal û zîndewerên me, xwezaya bê zar û ziman jî bê par nehişt. Bi polîtîkayên xwe yên kirêt, hebûna gelan, bîr û baweriyên qedîm înkar kir, nebû îmha û qirkirinên spî dan ber xwe. Ev jî wekî bişaftina çand û zimanan, ser erd û bin erd, her wiha bi tunekirina warên dîrokî kokbirîna civak û gelan esas hat girtin, qirkirina topyekûn dan meşandin.
Faşîzm li her derê belav bûye
Îro jî nûnerên vê dîroka kirêt û serûbinhevkirî AKP û MHP ne. Ev kom, hemû beşên civakên dijberên xwe li Tirkiye û Kurdistanê wekî dijmin dihesibîne û dixwaze biqutifîne. Şerên li hemberî daxwaza wekhevî û azadiya kurdan, li hemû Tirkiyeyê îlan kiriye. Şerê vê komê li hemberî kurdan û hêzên demokrat wekî polîtîkayên tepisandin û qutufandinê îlan kiriye, li Kurdistanê qirkirina siyasî, çandî û ekolojîk. Li Tirkiyê jî; bi taybetî li hemberî jinên azadîxwaz, kedkar û karmend, bi tevayî hêzên demokrat û dijberan siyaseteke çewisandin, pelçiqandin û ji taqetxistî tê meşandin.
Faşîzma bi sed salan e, li Kurdistanê dihat meşandin, niha; ji Kurdistanê li seranserê Tirkiyeyê belav bûye.
Li Kurdistan û Tirkiyeyê hema hema her kes (ji xeynî çend hezkiriyên şer û sermayedaran) her roj bi binçavkirin, girtin û mirinan ve şiyar dibe, tu beşek civakê tune ku ji vî şerî bandor lê neke û mexdûr nebe.
Pîvana şer derketiye asta jor
Kurd û hêzên demokrat, di demeke dijwar û li hemberî şerek bêpîvan ve rû bi rû mane. Koma desthilatdar a AKP û MHP wekî kabîneya şer tevdigere, çi li hundir çi li derve yê Tirkiyeyê, bi şer û tundiya faşîzma xwe; roj bi roj ber bi jortir dibe.
Bûyer û pêkûtiyên niha xistine meriyetê, ji îşkenceyên salên 90’î bi rêk û pêktirîn jî bi bîr dixin. Wekî mirovan ji firokan avêtin, li qerekol û kalekolan lêdan, îşkenceyên alenî û her wiha. Dîsa bi destên faşîstên nijadperest, kedkarên demsalî (karkerên kurd) têne tehdîdkirin, kuştin û pêkûtiyên faşîzan cûr bi cûr li ser gelan, her roj tên meşandin.
Baweriya civakê bi hiqûq û edaletê nemaye
Bi destê erk û îktîdara hevpar a faşîst AKP û MHP’ê, ji ber xurtkirin û pêşî lê vekirina bûyerên nijadî ku li hemberî kurdan tê meşandin, dabeşiya di nav civakê de gîhiştiye lûtkeya herî jor. Ji rêzê dîtina kirêtî û xerabî bi awayek rêxistinî tê pêşxistin û li ser civakê tê ferzkirin. Ev erka kirêt li hemberî daxwaz û vîna jinên azadîxwazan re, bi bersiva destdirejî, tundiya fizîkî heta bi qetilkirinan rebazên cûr bi cûr bi kar tîne ku kaosa nav civakê kûrtir bike. Her wiha li hemberî ciwanên têkoşîna demokratîk dimeşînin, her cûre êrîş li ser wan kêm nake; ciwan têne tehdîdkirin û her cûre êrîş, rewa tê dîtin, îşkenceyan de tên derbaskirin. Girtiyên nexweş her roj bi mirinê re rû bi rû têne hiştin, yek bi yek tên qetilkirin, zindan bi siyasetmedaran, rojnamevanan, rewşenbîr û nivîskaran tên dagirtin. Baweriya civakê ji edalet û hiqûqê nemaye, dad bi tevahî di bin fermana qesrê de bi awayekî bendewar û muptela hatiye hiştin.
Tecrîdkirina Ocalan
Qada bêhiqûqiya tê birêxistinkirin jî li Îmraliyê ye!
Li hemû qadên Tirkiyeyê, bê hiqûqî û bê edaletiya bi destê AKP-MHP’ê tê meşandin. Ji Îmraliyê dest pê dike. Li Îmraliyê tecrîda girankirî ya ku birêz Abdullah Ocalan pê re rûbirû hiştine, bê edaletî, hiqûq nenasî, ji bo hemû beşên civakê jî pêkûtiyan bi xwe re tîne, roj bi roj şert û mercên aştiyê jî ji holê radike û tune dike. Ev tunebûyîn, bêguman; tunekirina dahatuya gelan hedef digire.
Têkoşîna li dijî tecrîda girankirî ya li Îmraliyê, ne tenê kurdan, her wiha beşên civakê hemû wek berpirsiyarî dibîne û eleqedar dike. Ji ber ku; jiyanek azad û aştiyane, demokrasî hêviya dîrokî ya civakan e, ne ya dewletan e. Em jî bi vê mabestê, li hemberî faşîzmê ji bo dahatûya gelan bilindtir bikin, xwedî li xeyalên xwe derbikevin, hêviyên xwe yên jiyana aştî û aram xurtir bikin, em car din banga bi dawîkirina tecrîda giran a li ser birêz Ocalan dikin.
Aboriya Tirkiyeyê ji şer re tê veqetandin
AKP û MHP bingeh û dahatûya tifaqa xwe di şer de dibînin. Şer her çiqas didome, xizankirina gelan bi xwe re tîne!
Hemû çavkaniyên aborî, hêz û enerjiya beşên civakî û siyasî yên Tirkiyeyê, ev erk û îktîdar ji bo berjewendiyên tifaqa faşîst bikar tîne û dike qûrban. Lêçûyînên şer ji kedkaran tê birîn, roj bi roj civak ji milê aborî ve xizantir dibe. Tifaqa faşîst a çok dide, her ku diçe kêmketina piştgiriya îktîdara xwe dibîne, ew çend asta şer û pêkûtiyên xwe li hemberî çi bawermend çi nasnameyan bilindtir dike, tu kes û beşên civakê ji xizaniyê bê par nahêle.
Werin em mil bidin milên hev
Em li dijî vê xizan û hêjarkirinê, bangî gelên Tirkiyeyê hemûyan dikin ku rêxistinbûyîna xwe ya civakî û demokratîk pêşxin û têbikoşin. Em dibên; werin mil bidin hevûdu, ji bo meşaleya azadiyê hemû bi hev re gur bikin, ji bo edalet, demokrasî û civaka aştiyane pêk bînin. Em dibên, werin vî welatî ji vê faşîzmê bi tev de xilas bikin, ji bo welateke hevpar, adîlane û demokratîk têbikoşin û ava bikin. Dem ne dema jarî û sistiyê ye, roj roja seknê nîne.
Ji bo maf, nasname û dahatûya gelên me, têkoşîna dîrokî bang li me dike!
Li dijî vê pergala ceberûd; wekî ku tê zanîn bi piraniya rêjeya civaka Tirkiyeyê nerazî û asta redkirina faşîzmê dane. Berpirsiyariya dîrokî; di serî de li gelê kurd, her wiha li ser civak, gel, şexs û hemwelatiyan hemû ferz dike.
Her roj pêl bi pêl binçavkirin
Ji ber ku AKP-MHP a faşîst, xwe li ber demokrasî û azadiya gelên kurdistanî kiriye bendek erka siyasî. Bi mohr û zincîrkirina derê KCD’ê û bi serdegirtinên malên endamên rêveber û endamên HDP’ê, bi tevahî operasyonên qirkinên siyasî, derdixe holê ku; AKP-MHP ya faşîst, tu vîna gelê kurd û gelên li Tirkiyeyê nas nake û li ser hîmê dijminiya gelan, tifaqên xwe ya kirêt, mafê tu kesan nasnekirinê hatiye damezirandin.
Li hemberî vê rastiyê; divê em jî wekî gelên kurdistanî bi ruhek yekitî, bi rêbazên demokratîk têbikoşin û faşîzmê têk bibin da ku ji dîrokek nû nivîsandinê re amade bin!
Em jî divê; mil di mil de, ewrên reşên faşîzan ku li ser çand, ziman, vîn, jiyan û hebûna me kon vegirtiye hilweşînin, ji her gavê zêdetir, ji bo berpirsiyariya xwe ya li hember dîrokê têbikoşin, dem ev dem e.
Faşîzmê têk bibe azadiyê pêk bîne
Em bi vê pêwistiya berpirsiyariya dîrokî bangî gelên kurdistanî hemû dikin; Dem dema li dijî faşîzmê avakirina demokrasiyê, li dijî şer pêkanîna aştiyê, li dijî tecrîdê bidestxistina azadiyê ye. Bi dû tarîtiya çav bi çavan nakeve re, dem dema berbanga herî nêzî ronahiyê ye. Dem dema dawî lê anîna desthilatdarî û koledariya dused sal e hatî ferzkirin e.
Ji zarokan heta kal û pîran
Em ji niha ve we vedixwînin ku ji bo hêviya azadiya gelê xwe, em pêk bînin, ji îro û pê de li dijî pergala faşîst bi hev re hilweşînin, mil di mil de têkoşîna bê navber a demokratîk heta em biencam dikin têbikoşin. Heta em bi jin, zarok, ciwan, kal û pîrên xwe, bi kedkar û karmendên xwe re, bi gundî û bajarvaniyên xwe re, bi baweriyan û gelan hemû tev de demokrasiyê ava bikin wê têkoşîna me bidome.” AMED
